Bilim básekesiniń saltanatty ashylýy Almaty Theatre sahnasynda ótti. İs-sharaǵa myńǵa jýyq qonaq pen qatysýshy jınaldy.
10–15 qańtar aralyǵynda mektep oqýshylaryna arnalǵan matematıka, fızıka jáne ınformatıka pánderi boıynsha 22-shi Halyqaralyq Jáýtikov
olımpıadasy ótpek.
Bıyl álemniń 16 elinen 612 oqýshy men 122 jetekshi kelip otyr. Qatysýshy komandalar ulttyq olımpıadalardyń qorytyndysy boıynsha iriktelgen.
Bes kúnge sozylatyn saıys eki týrdan – teorıalyq jáne praktıkalyq kezeńderden turady. Tapsyrmalar mamandandyrylǵan synyptardyń oqý baǵdarlamasyna sáıkes ázirlengen.
Olımpıada qorytyndysy boıynsha jeńimpazdar men júldegerler dıplomdarmen, sondaı-aq altyn, kúmis jáne qola medaldarmen marapattalady.
“Bul olımpıadanyń basty ereksheligi – onyń ári jeke, ári komandalyq formatta ótýinde. Komandalar mindetti túrde bir mektepten jasaqtalýy tıis. Osy arqyly biz fızıka-matematıka jáne STEM baǵytyndaǵy úzdik mektepterdi anyqtaımyz”,-deıdi uıymdastyrýshylar.
Sondaı-aq, bıyldan bastap saıysqa qatysýǵa shekteý de engizilgen. Endi ár memleketten 4 komanda ǵana qatysa alady. Al ótken jylǵy komandalyq jeńimpaz atanǵan 7 komanda kvotasyz qatysý múmkindigine ıe boldy.
“Halyqaralyq Jáýtikov olımpıadasy bıyl Almaty qalasynda ótýde. Buǵan deıin 20 ret Almatyda uıymdastyrylsa, byltyr olımpıada Astana qalasynda ótken bolatyn. Bıyl qaıtadan Almatyda ótkizip otyrmyz. Shetelden 45 komanda keldi. Ár komandada 7 oqýshy men 2 jetekshi bolady. Oqýshylar pánder boıynsha bólinedi, ıaǵnı 3 matematık, 2 fızık jáne 2 ınformatık. Olımpıada aıasynda muǵalimderge arnalǵan matematıka, fızıka jáne ınformatıka pánderi boıynsha «IMPACT» atty qosymsha olımpıada da ótedi”, - deıdi «Respýblıkalyq fızıka-matematıka mektepteri» komersıalyq emes aksıonerlik qoǵamy basqarma tóraǵasynyń birinshi orynbasary Almas Kúngojın.
Halyqaralyq komısıanyń tóraǵasy, akademık Asqar Jumadildaevtyń aıtýynsha, oqýshylarǵa ǵylymǵa negizdelgen, mazmuny tereń, kúrdeli esepter beriledi. Barlyq tapsyrma oqý baǵdarlamasyna sáıkes bolǵanymen, olardy oryndaý joǵary daıyndyqty talap etedi.
“Jáýtikov olımpıadasy - álemdik deńgeıde uıymdastyrylatyn halyqaralyq mártebege ıe respýblıkadaǵy jalǵyz pándik olımpıada. Álemdik olımpıadalyq kúntizbe jyl basynda dál osy Jáýtikov olımpıadasynan bastalady. Bizden erte ótetin mundaı halyqaralyq deńgeıdegi olımpıada joq. Bıylǵy olımpıadaǵa Pákistan alǵash ret qatysyp otyr. Alǵashqy jyldary Vetnam, Kambodja jáne Qytaı sıaqty memleketter de qatysýy múmkin. Bul olımpıadanyń halyqaralyq aýqymynyń keńeıip kele jatqanyn kórsetedi”,- deıdi akademık.
Jáýtikov olımpıadasyna bıyl úshinshi márte qatysyp otyrǵan almatylyq oqýshy Ádil Jıenbaev jarysqa tastúıin daıyn.
“Respýblıkalyq fızıka-matematıka mektebinde 11-synyp oqımyn. Olımpıada tapsyrmalary óti kúrdeli, mekteptegi ustazym ıntensıvti túrde daıyndaıdy. Ásrese, ekperımentaldy týrǵa daıyndyǵym joǵary. Jaqsy nátıje kórsetý úshin bar kúshimizdi salamyz”,- dedi Ádil.