Sanıtarıyalyq-epıdemıologıyalyq baqylau departamentíne bıyl taǵamnan ūshyndy degen kúdíkpen 46 ótínísh kelíp túsken. Soǵan oraı 18 jospardan tys tekseru júrgízílíp, kópshílík tamaqtanatyn 3 jerdíń tazalyqqa qatysty talapty būzǵany anyqtaldy. Óńírlík kommunıkatsıyalar qyzmetínde Departament basshysynyń orynbasary Gauhar Qatkenova osylaı dedí.
Spıkerdíń aıtuynsha, būlar ónímníń jaramdylyq merzímí men saqtau talabyn saqtamaǵannan, qyzmetkerlerdíń jeke medıtsınalyq kítapshalary bolmaı, tamaq písíríp, taratar kezde qūral-jabdyqtardy dūrys qoldanbaǵannan bolǵan. Tekseru qorytyndysy boıynsha zańdy tūlǵalarǵa jalpy somasy 943,7 myń teńge kólemínde aıyppūl salynypty.
Almatyda bıyl 3 adamnyń botulızmmen auyrǵany da tírkelgen. Barlyq nauqas qajettí medıtsınalyq kómek aldy. Gauhar Qatkenovanyń aıtuynsha, tamaqtan ūshynu qaupí negízínen mereke kúnderí, sonyń íshínde jańa jyl qarsańy men ís-sharalar bolyp jatqan kezde jıílep ketetín kórínedí.
Taǵamnan ūshynudyń negízgí belgílerí – júrek aınyp, qūsu, íshtíń auyruy, ísh ótíp, bas aınalu, álsízdík. Auyr jaǵdaıda dene qyzuy kóteríledí, botulızm kezínde kózdíń kóruí nasharlap, jūtynu qıyndap, būlshyqette ál bolmaıdy.
"Alǵashqy belgíler paıda bolǵan jaǵdaıda árkím ózín-ózí emdeumen aınalysyp ketpeı, dereu medıtsınalyq kómekke júgínuí kerek. Būl asqynudyń aldyn aluǵa múmkíndík beredí", – deıdí Gauhar Qatkenova.
Sarapshynyń aıtuynsha, Almatyda kóbíne maıonez qosylǵan salattardy, termıyalyq óńdeuden dūrys ótpegen et pen balyq taǵamyn tūtynǵanda, sondaı-aq ūzaq tūryp qalǵan daıyn taǵamdardy jegen kezde ūshynyp qalady.
Departament merekelík kezeńde taǵam qauípsízdígín saqtau úshín mynandaı erejelerdí qaperge aludy ūsynady:
- tez būzylatyn ónímderdí +2…+4 °C temperaturada saqtau;
- daıyn taǵamdy bólme temperaturasynda 2 saǵattan artyq ūstamau;
- ettí, balyq pen jūmyrtqany tolyq termıyalyq óńdeuden ótkízu;
- úıde jasalǵan konservílerdí tūtynudan bas tartu;
- ıísí, syrtqy túrí kúmándí nemese merzímí ótken ónímderdí qoldanbau;
- ūshynǵan jaǵdaıda dárígerge qaralyp, kúdíktí taǵam qaldyqtaryn múmkín bolsa tekseru úshín saqtap qalu kerek.