Qalada jylytý maýsymy qalypty jaǵdaıda ótip jatyr. Áleýmettik nysandarǵa 8 qazanda, turǵyn úılerge jylý 10 qazannan bastap beriletin boldy.
Óńirlik komýnıkasıalar qyzmetinde Energetıka jáne sýmen jabdyqtaý basqarmasynyń basshysy Nurbaqyt Serikbaı osylaı dep málimdedi.
Basqarma basshysynyń aıtýynsha, Almatyda bıylǵy kúzgi jáne qysqy kezeńge daıarlyq barysynda ınjenerlik jelilerdi jańartý basty nazarda boldy. Bıyl 39 shaqyrym jylý jelisi qaıta jańǵyrtyldy. Bul jelilerdiń tozý deńgeıin 1,8%-ǵa tómendetýge múmkindik bergen.
«Jyl saıyn jylý jelileriniń tozý deńgeıin 1,8–2%-ǵa tómendetýdi josparlap otyrmyz», - dedi Nurbaqyt Serikbaı.
Qazir qalanyń barlyq apattyq qyzmetteri kúsheıtilgen jumys rejıminde istep jatyr. 100-den astam apattyq brıgada men 400-ge jýyq maman jumyldyrylǵan. Mazýt pen kómir qory da jetkilikti.
Spıkerdiń aıtýynsha, turǵyndardyń áli de jylý jelilerine bereshegi bar. Aralyq kezeńde bul másele jeke sot oryndaýshylary arqyly sheshilip jatyr. Ol jylý aqysyn ýaqytyly tóleý ınjenerlik jelilerdi jańartyp, ınvestısıalyq baǵdarlamalardy iske asyrýǵa múmkindik beretinin atap ótti.
Eske salaıyq, Almatyda jylytý maýsymy qala ákiminiń qaýlysyna sáıkes 8 qazanda bastaldy. Birinshi kezekte balabaqsha, mektep pen medısınalyq mekemeler sıaqty áleýmettik nysandarǵa jylý berildi.