Jazdyń eń jarqyn mádenı jobalarynyń bírí Almaty Summer Fest ayasynda altynshy open-air kontsertí sáttí óttí, – dep habarlaıdy aqshamnews.kz tílshísí.
Almaty qalasy ákímdígíníń qoldauymen ūıymdastyrylyp jatqan muzykalyq keshter qala tūrǵyndary men qonaqtaryna kóteríńkí kóńíl kúı syılap, jazǵy demalystyń sánín keltíríp otyr.
Joba bastalǵaly berí ótken alty kontsertke 60 myńnan astam kórermen qatysty. Ashyq aspan astyndaǵy sahnada Kalifarniya, Qanay, Búrkít pen Aısha, Janbolat pen Jazıra, Elnūr Nauryzbek, Ǵalamat Beıseqoja, Ernar Jūmataev, Aksunkar, Jūma Ábíl, Azamat Tórehan, Erdáulet Mūratūly, Nurislam, JVSMIN, Dana Turar, Baymaman jáne DJ Akhmetoff óner kórsettí.
Kontsert «Alatau» dástúrlí óner teatry alańynda ótíp júr. Būl oryn búgínde Alatau audanynyń tūrǵyndary men qala qonaqtaryn toǵystyratyn mańyzdy mádenı ortalyqqa aınalyp keledí.
Almaty Summer Fest jobasynyń basty maqsaty – qala tūrǵyndary men turısterge qoljetímdí árí sapaly mádenı demalys ūsynu, qazaqstandyq ónerpazdardy qoldau jáne Almatynyń mádenı ómíríne tyń serpín beru. Ashyq aspan astyndaǵy kontsertter túrlí jastaǵy kórermenderdíń qyzyǵushylyǵyn arttyryp, shahardyń jazǵy mádenı baǵdarlamasynyń aıtuly dástúríne aınalyp keledí.
Jaz boıy tanymal qazaqstandyq estrada jūldyzdary qatysatyn kontsert ár senbí saıyn jalǵasady. Almatylyqtar men qala qonaqtary alda álí talaı áserlí árí áuezdí kontsertke kuá bolady.