Almatyda medıtsınalyq turızmdí damytuǵa arnalǵan halyqaralyq forum ótíp jatyr. Būl jıynǵa densaulyq saqtau júıesíníń ókílderín, turıstík sala mamandaryn jáne halyqaralyq seríktester qatysyp otyr, – dep habarlaıdy aqshamnews.kz tílshísí Almaty Turızm basqarmasyna sílteme jasap.
Forum barysynda halyqaralyq yntymaqtastyqty keńeıtu, joǵary tehnologıyalyq emdeu ádísterín engízu jáne medıtsınalyq qyzmetterdíń básekege qabílettílígín arttyru máselelerí talqylandy.
"Qazír Qazaqstan, sonyń íshínde Almaty qalasy, Ortalyq Azıyadaǵy medıtsınalyq turızmníń jetekshí ortalyqtarynyń bíríne aınalyp keledí. Bíz damyǵan turıstík ınfraqūrylymdy, sapaly medıtsınalyq qyzmet kórsetudí jáne qolaıly kólík qatynasyn tıímdí ūshtastyryp otyrmyz", - dedí shahardyń sheteldík patsıentterdí tartudaǵy áleuetí joǵary ekenín ataǵan Almaty qalasy Turızm basqarmasy basshysynyń orynbasary Aqmaral Eshchanova.
Onyń aıtuynsha, qalada patsıentterge keshendí qyzmet kórsetu júıesí jolǵa qoıylyp keledí. Sapardy ūıymdastyrudan ońaltuǵa deıín tízbek tolyq qarastyrylǵan. Al halyqaralyq standarttardy engízu sheteldík azamattardyń senímín arttyryp otyr.
Forum ayasynda Úndístanmen áríptestík máselesíne erekshe nazar audaryldy.
"Almaty men Úndístan medıtsınalyq turızm salasyndaǵy yntymaqtastyqty damytuǵa tūraqty qyzyǵushylyq tanytyp otyr. Bírlesken bastamalar tájírıbe almasuǵa jáne zamanauı medıtsınalyq tehnologıyalardy engízuge jol ashady", — dedí úndí delegatsıyasynyń ókílí Shrı Hotı Lal.
«Qazaqstan patsıentter úshín tartymdylyqtyń negízgí alǵysharttaryna ıe. Medıtsınalyq kómektíń sapasy men qauípsízdígí memleket tarapynan kepíldendírílgen. Al densaulyq saqtau júıesí halyqaralyq standarttar men dáleldí medıtsına qaǵıdattaryna negízdelgen», - dedí salany damytudyń júıelí tásílín ataǵan Salıdat Qaıyrbekova atyndaǵy Ūlttyq ǵylymı densaulyq saqtaudy damytu ortalyǵy basqarma tóraǵasynyń orynbasary Sholpan Qarjaubaeva.
Forum ayasynda onkologıya, transplantologıya jáne neırohırurgıya salalaryn damytu, sondaı-aq ozyq medıtsınalyq tehnologıya engízu máselelerí qarastyryldy.
Qatysushylardyń píkírínshe, halyqaralyq yntymaqtastyqty nyǵaıtu Almatyǵa sheteldík patsıentter legín arttyryp, medıtsınalyq ınfraqūrylymnyń odan árí damuyna serpín beredí.