Ūlystyń ūly kúní qarsańynda el aumaǵyndaǵy bílím oshaqtarynda salt-sanamyzdy dáríptegen túrlí ís-sharalar legí jalǵasyp jatyr. Almaty oblysy, Talǵar audanyna qarasty Tūzdybastau auylyndaǵy Ál-Farabı atyndaǵy №31 jalpy bílím beretín orta mektepte «Ūlt kody: Ónerdegí órnek» atty auqymdy shara óttí, – dep habarlaıdy aqshamnews.kz tílshísí.
Mektep dırektory Anarkúl Qūlambekqyzy Mandybaevanyń basshylyǵymen dırektordyń Tárbıe Ísí Jóníndegí Orynbasarlary Sarsebaeva Danara Málíkqyzy, Amanqūlova Móldírgúl Asylhanqyzynyń ūıymdastyruymen ótken sharanyń basty maqsaty – ūlttyq mádenı mūrany dárípteı otyryp, dástúrlí ónerdí jas ūrpaqqa nasıhattau jáne qazaq halqynyń ruhanı qūndylyqtaryn zamanauı formatta tanytu.
Shara mektep aulasyna jınalǵan qonaqtardy ūlttyq dástúrge saı qarsy aludan bastaldy. Aq kımeshek kıgen ájeler shashu shashyp, aqjarma tílegín arnasa, aqsaqaldar bata beríp jastarǵa ónege kórsettí. Qazaqy qonaqjaılyqtyń úlgísí retínde kelgen qonaqtar ūlttyq dámnen auyz tıíp, kóne dástúr jańǵyrdy.
Merekelík alańda oqushylardyń qatysuymen asyq atu, arqan tartys, qazaqsha kúres, bórenege shyǵu sıyaqty ūlttyq oıyndar ūıymdastyryldy. Arnaıy ūsynylǵan etno-kórme kelushílerge erekshe áser syılady. Kórmede ūlttyq oyu-órnek kompozıtsıyalary, qolóner sheberleríníń tuyndylary kórsetílíp, mektep oqushylary men ūstazdary án men kúıden shashu shashty.
Shara barysynda sóz alǵan mektep dırektory Anargúl Mándíbaeva Nauryznama onkúndígíníń tárbıelík mańyzyna toqtalyp, aıtuly bastama oqushylar úshín ómírlík qūndylyqtardy boıǵa síńíretín tárbıe alańy ekenín basa aıtty.
«Nauryznama onkúndígí – ūlttyń jady men jańǵyruynyń toǵysqan tūsy, dástúr men búgínníń arasyn jalǵaǵan ruhanı kópír. Būl kezeń tek merekelík dumanmen shektelmeı, ár kúnníń ózíndík mazmūny arqyly qoǵamǵa, ásírese jas ūrpaqqa tereń taǵylym ūsynady. Oqushylarymyz úshín Nauryznama – tárbıe mektebí. Mūnda olar úlkendí qūrmetteu, kíshíge ízet kórsetu, tabıǵatpen úılesímde ómír súru, eńbek pen bírlíktíń qadírín túsínu sekíldí ómírlík mańyzdy qaǵıdalardy boıyna síńíredí. Ár kúnníń mazmūny – bír-bír ónege: qaıyrymdylyq, ūlttyq óner, tazalyq, tatulyq, jańaru. Būl ūǵymdar jasóspírím sanasynda eldík pen adamgershílíktíń írgetasyn qalaıdy. Sonymen qatar, Nauryznama – jastardyń ūlttyq bolmysyn tanuyna jol ashatyn alań. Zamanauı jahandanu dáuírínde tól mádenıetke degen qyzyǵushylyqty arttyryp, ūlttyq kodty saqtaudyń mańyzyn ūǵyndyrady. Dombyra úní, ūlttyq oıyndar, dástúrlí taǵamdar men ádet-ǵūryptar – bárí de jas ūrpaqtyń júregíne elge degen súıíspenshílík ūyalatady. Bízdíń mektebímízde qazaq, orys, ūıǵyr tílderínde bílím beríledí. Ís-sharanyń bír maqsaty olardyń báríne ūlttyq salt-dástúrlerímízdíń taǵylymyn tanytu», deıdí Ál-Farabı atyndaǵy №31 orta mekteptíń dırektory Anargúl Mándíbaeva.
Dástúrlí ónerge arnalǵan sheberlík saǵattary baǵdarlamanyń taǵy bír mańyzdy bólígíne aınaldy. Mūnda qonaqtar dombyra jasau, qysh qūmyra daıyndau, kıíz basu, shı toqu sıyaqty ūlttyq qolóner baǵyttarymen tanysyp, sheberlerdíń jūmysymen tanysty. Qaıyrǵalı Atabaıūly jetekshílík etetín «Toǵyzqūmalaq» úıírmesíníń jetkínshekterí erekshe oıyn tásílín kórsettí. «Būl bólím dástúrlí ónerdíń qyr-syryn zamanauı formatta kórsetuge baǵyttalǵan» deıdí ūstazdar.
Ís-sharada Talǵar audandyq ádístemelík ortalyǵynyń ádískerí Anar Ábeuova ǵasyrǵa juyq tarıhy bar mekteptíń mazmūndy sharasyna joǵary baǵa beríp, jınalǵandardy merekemen qūttyqtady.
Mektep íshínde etno-kórme men ūlttyq bezendíru kórínísterí ūsynylady. Kórmede ūlttyq oyu-órnek kompozıtsıyalary, qolóner sheberleríníń tuyndylary qoıylyp, qazaq ūlttyq aspaptar orkestríníń oryndauynda kúı shyrqalady. Būl kórme qonaqtarǵa qazaq halqynyń sándík-qoldanbaly ónerí men muzykalyq mūrasynyń baılyǵyn tanystyrdy. Ís-shara kontserttík baǵdarlamaǵa ūlasyp, «Ekí jūldyz» án baıqauymen jalǵasyn tapty.