7 shilde kúni Almaty men Aqtóbede aýa sapasy nasharlaıdy, dep habarlaıdy aqshamnews.kz "Qazgıdromet" RMK-ǵa silteme jasap.
Sınoptıkterdiń málimetinshe, atalǵan qalalarda atmosferalyq aýanyń lastaný deńgeıi artýy múmkin. Mundaı qubylys qolaısyz meteojaǵdaılarmen (NMÝ) tikeleı baılanysty.
Qolaısyz meteojaǵdaılar – atmosferalyq aýanyń tómengi qabatynda zıandy zattardyń jınalýyna sebep bolatyn qysqa merzimdi meteorologıalyq faktorlardyń jıyntyǵy. Oǵan tynyshtyq, álsiz jel, tuman, ınversıa sıaqty tabıǵı qubylystar jatady, – dep habarlady sınoptıkter.
Aýa sapasynyń tómendeýi ásirese sozylmaly ókpe nemese júrek aýrýlary bar adamdarǵa keri áser etýi múmkin. Turǵyndarǵa dalada uzaq ýaqyt bolmaýǵa, fızıkalyq belsendilikti shekteýge jáne betperde qoldanýǵa keńes beriledi.
Aıta keteıik, aýa lastanýynyń deńgeıin anyqtaıtyn basty faktorlardyń biri – sınoptıkalyq jaǵdaıdyń boljamy, ıaǵnı jeldiń baǵyty men jyldamdyǵy, jaýyn-shashyn, aýa temperatýrasy men ylǵaldylyq deńgeıi.
Turǵyndarǵa aýa sapasy týraly jańartylǵan málimetterdi «Qazgıdromet» saıty men resmı arnalary arqyly qadaǵalap otyrý usynylady.