Bostandyq aýdany Saın men Kekilbaev kósheleriniń arasyndaǵy Toraıǵyrov kóshesi boıyndaǵy júrginshiler aımaǵyn qaıta qurý aıaqtaldy. «Halyq qatysatyn búdjet» baǵdarlamasy jáne turǵyndardyń bastamasymen bul aımaq serýendeıtin, demalatyn qoǵamdyq keńistikke aınaldy. Bul týraly Bostandyq aýdanynyń ákimdigi habarlady.
Buryn ıesiz bos jatqan aımaq búginde tanymastaı ózgerdi. Jergilikti turǵyn Aıman Bekbergenova shóbi qýraǵan, jaryǵy joq aımaqty abattandyrý jóninde bastama kóterdi. Onyń bul ıdeıasyn kórshileri qoldap, sońynan HQB jobasy boıynsha kóp daýys jınaldy. Sonyń nátıjesinde joba qarjylandyrylyp, aýdan ákimdigimen birlesip aımaq abattandyrylyp, halyq demalatyn qoǵamdyq keńistikke aınaldy.
Búginde Toraıǵyrov kóshesi – abattandyrylǵan qoǵamdyq keńistik, onyń jalpy alańy 4,2 gektardan asady. Munda taktıldi taqtasy bar keń trotýarlar, velojoldar, aǵash pergolalary bar demalys aımaqtary, vorkaýt jáne balalar oıyn alańdary paıda boldy. Qoǵamdyq keńistik qaýipsiz jáne jaıly. 200 jaryq shamy, 12 beınebaqylaý kamerasy ornatylyp, yńǵaıly oryndyqtar men qoqys jáshikteri qoıylǵan. 500 aǵash pen 1500-ge jýyq buta otyrǵyzylǵan. Jasyl jelek kóz tartady.
Aýdan turǵyndary bul ózgeristerge rıza. «Men basqa aýdanda turamyn, biraq osy aımaqqa jaqyn jerde jumys isteımin. Túski úziliste osynda kelip, serýendeımin. Maǵan óte unaıdy», - dedi almatylyq Jansaıa Ámze.
«Buryn jańbyr sýy trotýardan asyp, dúkenge deıin aǵatyn edi. Aımaqta joba negizinde biraz jumystar júrgizilgeli beri aınala tanymastaı ózgerdi. Jastar munda fotosessıa uıymdastyrady, biz rızamyz», - dedi jergilikti turǵyn, dúken satýshysy Janna Jaqıanova.
Keshke qaraı alańǵa kelýshiler kóp bolady, otbasylar balalarymen keledi, zeınetkerler oryndyqqa otyryp demalady, al jastar taza aýada serýendep, jattyǵý jasaıdy. Jańa qoǵamdyq keńistik kópshilik jınalatyn ortaǵa aınaldy», - dedi jergilikti turǵyn Galına Jangeldına.
Qazirgi kezde qoǵamdyq keńistiktiń aınalasy abttandyrylyp jatyr. 2025 jyldyń sońyna deıin munda sport alańyn, ekoaımaq jáne gúlder aleıasyn ashý josparlanyp otyr.
Toraıǵyrov kóshesiniń jańa keıpi - qala turǵyndarynyń «Halyq qatysatyn búdjet» baǵdarlamasyna belsendi qatysýynyń aıqyn dáleli. Bul joba Almatyny kórkeıtýmen qatar, qala turǵyndarynyń shaharǵa degen súıispenshiligin de arttyrady.