Búgin, 9 qańtarda Almatyda qazaqstandyq akter Murat Bısembındi aqtyq saparǵa shyǵaryp salý rásimi ótip jatyr, dep habarlaıdy Aqshamnews.kz tilshisi.
Qoshtasý rásimi saǵat 10:00-de Almatynyń Ortalyq meshitinde (mekenjaıy: Pýshkın kóshesi, 16) bastaldy. Data, ýaqyt jáne oryn týraly málimetti akterdiń qyzy habarlaǵan.
Murat Bısembın 54 jasqa qaraǵan shaǵynda dúnıeden ótti. Ol otandyq kınodaǵy rólderimen kópshilikke keńinen tanylyp, harızmasymen jáne este qalarlyq ekrandyq beınelerimen kórermenniń yqylasyna bólengen. Ásirese «Reketır» fılmindegi Rýslan róli akterdiń tanymaldyǵyn arttyryp, ony qazaqstandyq kıno ónerindegi eń bedeldi tulǵalardyń birine aınaldyrdy.
Marqumnyń áriptesi Jan Baıjanbaevtyń aıtýynsha, akter bir jyldan astam ýaqyt onkologıalyq dertpen kúresken. Sońǵy kezde jaǵdaıy kúrt nasharlap, shuǵyl ımmýnoterapıa qajet bolǵanymen, dárigerlerdiń jáne jaqyndarynyń kúsh-jigerine qaramastan, ony aman alyp qalý múmkin bolmaǵan.
Murat Bısembın 1972 jyly 11 qazanda Qyzylordada týǵan. Aldymen polıtehnıkalyq ınstıtýtty aýyl sharýashylyǵynyń ınjener-mehanıgi mamandyǵy boıynsha támamdaǵanymen, keıin akterlik joldy tańdaǵan. Óner ıesi otbasyly, úsh balanyń ákesi bolǵan.