«Almaty» ÁKK» AQ-nyń enshiles uıymy — «MQU «Almaty» JSHS 2025 jyly «Almaty Business – 2025» óńirlik kásipkerlikti damytý baǵdarlamasy aıasynda Almatynyń shaǵyn jáne mıkro bıznesine 72 jeńildetilgen nesıe berdi.
Jańadan bastaǵan jáne jumys istep turǵan kásipkerler bıznesin damytý úshin jyldyq 2% jáne 6% jeńildetilgen mólsherlememen qarjy aldy, - dep habarlaıdy Aqshamnews.kz.
Ótken jyly berilgen nesıelerdiń jalpy kólemi 3,2 mlrd teńgeden asty. Bir qaryz alýshyǵa beriletin qarjylandyrý lımıti 78,64 mln teńge, al eń joǵary nesıeleý merzimi 7 jyl boldy.
Salalyq turǵyda eń kóp qarjylandyrylǵan jobalar óndiris jáne qaıta óńdeý salasyna tıesili — bul barlyq qoldaý tapqan jobalardyń 32%-y. Sondaı-aq, halyqqa qyzmet kórsetý salasyndaǵy jobalar – 24% jáne densaýlyq saqtaý – 21% boldy. Budan keıin bilim berý – 8%, kreatıvti ekonomıka – 7%, sondaı-aq týrızm men sport – árqaısysy 4% boldy.
«Almaty Business – 2025» baǵdarlamasy 2019 jyly iske qosylǵaly beri «MQU «Almaty» Almatyda jalpy somasy 16,5 mlrd teńge bolatyn 659 jobany qarjylandyrdy. Ásirese, eń úlken qoldaý óndiristik jobalarǵa – 29% jáne densaýlyq saqtaý salasyndaǵy jobalarǵa – 16% baǵyttaldy. Qarjylandyrýdyń taǵy 10%-y áleýmettik kásipkerlikke tıesili, bul jobalar jyldyq 2% eń tómengi jeńildetilgen mólsherlememen nesıe aldy.
Aýmaqtyq bóliniste eń kóp joba Bostandyq aýdanynda qoldaý tapty — 141 nesıe. Odan keıin Alataý aýdany — 110, Almaly — 88, Medeý — 80, Áýezov — 77, Naýryzbaı — 67, Jetisý — 49 jáne Túrksib — 47.
MFO «Almaty»-diń jeńildetilgen nesıeleý baǵdarlamasy aıasynda qalada shamamen 3 000 jańa jumys orny quryldy. Sonymen qatar, baǵdarlama boıynsha qaryz alýshylar bıznesin damytý esebinen búdjetke shamamen 3 mlrd teńge salyq tóledi.
Qazirgi ýaqytta «Almaty Business» baǵdarlamasyn uzartý máselesi qarastyrylyp jatyr. Bul týraly qosymsha habarlanady.