Almaty qalasy ákímíníń orynbasary Beıbít Shahanov Tílendıev kóshesín ūzartu úshín memleket mūqtajyna satyp alynatyn jer telímderí men tūrǵyn úılerdíń ótemaqy kólemíne qatysty másele kótergen Alatau audanynyń tūrǵyndarymen kezdestí.
Kezdesu barysynda ákímníń orynbasary qala basqarmalarynyń ókílderímen bírge tūrǵyndardyń ótínísh-saualdaryn tyńdap, qoldanystaǵy zań normalaryna túsíníkteme berdí.
"Qala qarqyndy damyp keledí. Mektep, emhana, sport jáne mádenıet ortalyǵy, sondaı-aq kólík ınfraqūrylymyn keńeıtu, jańa metro beketterín salu, magıstraldyq kóshelerdí ūzartu sekíldí ınfraqūrylymdyq jobalardyń qajettílígí artyp otyr. Osy jobalardy júzege asyru úshín būrynnan qalyptasqan audandar men jeke qūrylys basym aumaqtardy qaıta ūıymdastyru qajet. Sol sebeptí jer telímderín satyp aluǵa májbúrmíz. Būl táuelsíz baǵalau negízínde naryq qūny boıynsha júrgízíledí, ákímdík baǵalau nátıjesíne yqpal ete almaıdy", – dedí Beıbít Shahanov.
Kezdesuge kelgen Ójet shaǵynaudanynyń tūrǵyndary múlíktíń baǵalau qūnynmen kelíspeıtínín aıtty. Sondaı-aq, kópshílígíníń jer telímderí men qūrylys nysandaryna qatysty qūqyq belgíleıtín qūjattary joq.
"Búgínde shamamen 30 menshík ıesínde jer men tūrǵyn úıge qatysty qūjat rásímdeuge baılanysty qıyndyqtar bar. Salaǵa jauapty basqarmalar árbír jaǵdaıdy jeke qarastyryp, qajettí túsíndíru jūmystaryn júrgízuí, al qajet bolǵan jaǵdaıda qoldanystaǵy zańnama ayasynda múlíktí zańdastyruǵa járdem kórsetuge tıís", – dedí ákímníń orynbasary.
Kezdesu sońynda Beıbít Shahanov Jer qatynastary basqarmasyna audan ákímdígímen bírlesíp tūrǵyndar arasynda tūraqty túrde túsíndíru jūmystaryn júrgízudí, sonymen qatar baǵalau kompanıyasynyń ókílderímen kezdesu ūıymdastyryp, múlíktí baǵalau talaptaryn keńínen túsíndírudí tapsyrdy.
Aıta keteıík, Almatynyń 2040 jylǵa deıíngí Bas jospary ayasynda kólík qatynasynyń qoljetímdílígín arttyru jáne jol-kóshe jelísín jetíldíru maqsatynda Tílendıev kóshesín Rysqūlov dańǵylynan qala shekarasyna deıín ūzartu qarastyrylǵan.
Tílendıev kóshesín ūzartu jobasy ekí kezeńge bólíngen:
1. Bírínshí kezeń – Rysqūlov dańǵylynan Sabataev kóshesíne deıín, ūzyndyǵy 5,8 shaqyrym. Mūnda 123 jer telímín satyp alu kózdelgen.
2. Ekínshí kezeń – Sabataev kóshesínen qala shekarasyna deıín, ūzyndyǵy 4,9 shaqyrym. Būl kezeńde 344 jer telímí satyp alynuǵa tıís.
Búgínde 70 jer telímí satyp alyndy. Eske sala keteıík, memleket qajetíne jer telímderí zańnamaǵa sáıkes naryq qūny boıynsha satyp alynady. Baǵalau menshík qūqyǵy qalaı paıda bolǵanyna, qūjattyń tolyq boluyna nemese bolmauyna baılanysty emes, yaǵnı baǵalau barlyq jaǵdaıda naryq qūnyna negízdeledí.