Almaty ákímí Darhan Satybaldy zańsyz ornatylǵan statsıonarlyq emes sauda nysandaryn retteu jáne qoǵamdyq tamaqtanu oryndary janyndaǵy jazǵy alańdardyń qyzmetín júıeleu máselelerí boıynsha arnaıy keńes ótkízdí, – dep habarlaıdy aqshamnews.kz tílshísí.
Qalalyq Kásípkerlík jáne ınvestıtsıyalar basqarmasynyń basshysy Beríkbol Mándíbaev júrgízílgen monıtorıng nátıjesínde qala aumaǵynda 1595 zańsyz statsıonarlyq emes sauda nysany anyqtalǵanyn málímdedí. Onyń 509-y memlekettík jer telímderínde ornalassa, 210 nysan jekemenshík aumaqtarda jerdíń nysanaly maqsatyn būza otyryp qoıylǵan. Sonymen qatar, 876 nysan bekítílgen dızaın-kod talaptaryna sáıkes kelmeıdí. Basqarma basshysynyń aıtuynsha, mūndaı nysandar júrgínshíler qozǵalysyna kedergí keltíríp, qalanyń sáulettík kelbetíne nūqsan keltírude árí tūrǵyndardyń narazylyǵyn tudyryp otyr.
Keńes barysynda qala ákímí zańsyz sauda nysandaryna qatysty baqylaudy kúsheıtíp, būl baǵyttaǵy jūmystar zań talaptaryna saı, ashyq árí júıelí júrgízíluí qajet ekenín atap óttí.
«Būl máselede eń aldymen audan ákímderí jauapty boluy kerek. Olar kún saıyn aumaqtardy aralap, zańbūzushylyqtardy der kezínde anyqtauǵa míndettí. Jyl basynan berí bar bolǵany 157 nysan súrílgen, būl megapolıs úshín óte tómen kórsetkísh. Injenerlík jelílerden ajyratu máselesín qarastyryp, polıtsıyamen bírlesíp menshík ıelerín ákímshílík jauapkershílíkke tartu qajet. Zań báríne bírdeı boluy tıís. Bír aı íshínde naqty nátıje kútemín», — dedí Darhan Satybaldy.
Qazírgí tańda qalada statsıonarlyq emes sauda nysandaryn ornalastyruǵa arnalǵan 142 arnaıy oryn bekítílgen. Jyl sońyna deıín olardyń sanyn kóbeıtu josparlanyp otyr.
Sonymen qatar, keńeste qoǵamdyq tamaqtanu oryndarynyń jazǵy alańdaryn retteu máselesí de talqylandy. Búgínde mūndaı alańdardy qoǵamdyq tamaqtanu oryndarynyń shamamen 30 paıyzy paıdalanady. Alaıda qazírgí qoldanystaǵy talaptar olardyń uaqytsha árí jeńíl konstruktsıya ekenín tolyq eskermeıdí. Sonyń saldarynan kelísu rásímderí kúrdeleníp, rūqsatsyz ornalastyru jaǵdaıy kóbeıgen. Osyǵan baılanysty qalalyq Kásípkerlík jáne ınvestıtsıyalar basqarmasy kásípkerler úshín rásímderdí jeńíldetuge baǵyttalǵan qoldanystaǵy qaǵıdalarǵa ózgeríster engízudí ūsyndy.