Almaty ákimi Darhan Satybaldy Raıymbek batyr dańǵylynan Gogol kóshesine deıingi Pýshkın kóshesiniń boıyndaǵy kólik joly mańyndaǵy aýmaqty qaıta jańartý jumystarymen tanysty, dep habarlaıdy aqshamnews.kz
Joba qalanyń ortalyq bóligin keshendi kóriktendirý baǵdarlamasy aıasynda júzege asyp jatyr jáne jaıly ári qaýipsiz qalalyq orta qalyptastyrýǵa baǵyttalǵan.
Qalalyq qoǵamdyq keńistikterdi damytý basqarmasynyń málimetinshe, qaıta jańǵyrtý 6,5 gektar aýmaqty qamtıdy jáne júrginshi men kólik ınfraqurylymyn keshendi jańartýdy kózdeıdi. 1,1 shaqyrym aýmaqta kógaldandyrý, jaryq tirekterin ornatý, sý burý júıelerin salý jumysy júrgizilýde. Sonymen qatar, irgeles úılerdiń qasbetteri jóndelip, Raıymbek batyr eskertkishi qalpyna keltirilip jatyr. Kelesi jyly osy aýmaqta sý aıdynyn qalyptastyrý jáne qosymsha kógaldandyrý josparlanǵan. Erekshe nazar júrginshilerge yńǵaıly trotýarlar, qaýipsiz júrginshi aımaqtary jáne zamanaýı kórkeıtý elementterin jasaýǵa bólinýde.
Darhan Satybaldy jumystyń sapaly oryndalýynyń mańyzyn atap ótip, jobanyń jaıly qalalyq ortanyń biryńǵaı tujyrymdamasyna saı bolýy qajettigin aıtty. Jobany júzege asyrý júrginshiler úshin qolaıly jaǵdaı jasap, qalanyń syrtqy kelbetin jaqsartýǵa, sondaı-aq turǵyndar men qala qonaqtary úshin tartymdy, úılesimdi keńistik qalyptastyrýǵa múmkindik beredi.