Búgín Almaty ákímí Darhan Satybaldy jūmys sapary ayasynda «Janūya» kesheníne jáne Baǵanashyl yqshamaudanyndaǵy arnaıy áleumettík qyzmetterge mūqtaj balalardy qoldau ortalyǵyna bardy.
Qala basshysy «Janūya» kesheníníń jańa ǵımaratymen tanysty. Ol balalarǵa jáne erekshe bílím berudí qajet etetín balalarǵa arnalǵan. Būrynǵy ǵımarat zamanauı talaptarǵa saı bolmaǵandyqtan, Memleket basshysynyń tapsyrmasyna sáıkes 2024 jyly mekemení tolyq qaıta jańǵyrtu turaly sheshím qabyldandy.
Joba bıznestíń áleumettík jauapkershílígí ayasynda BI Group kompanıyasy men Agniet komek fund qorynyń qoldauymen júzege asyrylyp jatyr. Nysan 15 qyrkúıekte paıdalanuǵa berílmek. Jańa keshen qazírgí zaman talabyna saı salynyp, balalardyń tūruyna, oquyna jáne damuyna barlyq jaǵdaı jasalǵan. Ǵımarat 400 oqushy orny men 216 jatyn orynǵa eseptelgen.
Kezdesu barysynda ákím ortalyqtyń balalarymen, ūstazdarymen, sondaı-aq máslıhat deputattary men bílím salasynyń ókílderímen sóılestí. Olardyń arasynda belgílí pedagog, Qazaqstannyń eńbek síńírgen qaıratkerí Ayagúl Mırashova da boldy. Darhan Satybaldy jas ūrpaqty qoldau – memleket pen Almaty qalasy úshín basty míndettíń bírí ekenín atap óttí.
«Ózderíńíz kóríp tūrsyzdar, būl ǵımarat 1960-jyldary salynǵan. Sodan berí kúrdelí jóndeu jasalmaǵan, tek 2022 jyly azdaǵan jóndeu júrgízíldí. Prezıdentímíz Qasym-Jomart Kemelūly árdaıym basty baǵyt – balalarǵa jaǵdaı jasau ekenín aıtyp otyrady. Osyǵan baılanysty bíz būl nysandy byudjet esebínen jańǵyrtamyz dep josparlaǵanbyz. Alaıda BI Group kompanıyasy bastama kóteríp, balalarǵa arnap osy keshendí óz qarajatymen salyp berudí ūsyndy. Árıne, negízgí jauapkershílík – sízderde, ūstazdar men tárbıeshílerde. Memleket tarapynan da, bıznes ókílderí tarapynan da barlyq jaǵdaı jasalyp jatyr. Bíraq balalardy baǵyttap, tárbıeleıtín – sízder. Erteń osy jerden el basqaratyn azamattar ósíp shyǵuy kerek», – dedí Darhan Satybaldy.
Sondaı-aq búgín qala ákímí Darhan Satybaldy «Baǵanashyl» balalar úıíne de bardy. Ákím mūndaǵy qoldanystaǵy ǵımaratty qaıta jańǵyrtu jáne jańa korpus salu jobasymen tanysty. Joba Integra Construction kompanıyasynyń demeushílígímen júzege asuda.
Qūrylys kompanıyasy bastama kóteríp, barlyq shyǵyndy óz moınyna alatynyn aıtty. Olar ǵımaratty jóndeumen qatar, ınfraqūrylymdy jańartyp, balalardyń jaıly ómír súruíne qosymsha jaǵdaı jasaudy josparlap otyr. Qazírgí ǵımarat 1963 jyly salynǵan, ábden eskírgen. Balalar úıí 165 orynǵa eseptelgen, qazír onda 122 bala tūrady.
Qala ákímí barlyq qolǵa alynyp jatqan ís-sharalar balalardyń tárbıesí men damuyna qajettí jaǵdaı jasauǵa, sondaı-aq Memleket basshysynyń tapsyrmalaryn oryndauǵa baǵyttalǵanyn aıtty.
«Būl jobany júzege asyrudyń ekí joly bar. Bírínshísí – byudjet esebínen qarjylandyru. Ol úshín jobalyq-smetalyq qūjat ázírlep, memlekettík saraptamadan ótkízíp, konkurs jarıyalau qajet. Mūndaı rásímder shamamen úsh jyl uaqyt alady. Bíraq Memleket basshysynyń tapsyrmasyna sáıkes, jūmys kelesí jyly tolyq ayaqtaluy tıís. Búgín men «Janūya» keshenínde boldym. Būl nysandy kásípker óz qarajatyna salyp, shamamen 6 mlrd teńge jūmsady. Osy úlgíden shabyt alǵan taǵy bír kásípker atalǵan jobany júzege asyruǵa daıyn ekenín bíldírdí», – dedí Almaty ákímí Darhan Satybaldy.
Qazír ǵımaratqa ınjenerlík-tehnıkalyq tekseru júrgízílíp, jobalyq-smetalyq qūjattar daıyndalyp jatyr.
Tárbıelenushíler men qyzmetkerler Almaty qalasyndaǵy arnaıy áleumettík qyzmetterge mūqtaj balalarǵa arnalǵan №2 ortalyqqa uaqytsha kóshíríldí. Al «Baǵanashyl» ǵımaraty men jer telímí qala balansyna óttí. Būl sheshím Almaty qalasy men Almaty oblysynyń ákímderí bekítken «Baǵanashyl» múlíktík keshenín beru jóníndegí Jol kartasy ayasynda júzege asyryldy.