«Auezov City» tūrǵyndarynyń ózektí máselelerí sheshíldí
Almaty ákímí Darhan Satybaldy jūmys sapary barysynda «Auezov City» tūrǵyn úı kesheníne baryp, tūrǵyndarmen kezdestí. Kezdesude ınjenerlík ınfraqūrylym, abattandyru jáne aumaqtyń qauípsízdígíne qatysty ózektí máseleler talqylandy, - dep habarlaıdy Aqshamnews.kz.
Tūrǵyndar bírqatar ūsynys aıtyp, shaǵymdaryn jetkízdí. Atap aıtqanda, ınjenerlík jelílerdí qalanyń balansyna beru, shlagbaum ornatu jáne polıtsıya tírek punktín ashu qajettígí kóteríldí. Sondaı-aq, Áuezov kóshesí boıyndaǵy trotuarlardy kommertsıyalyq nysandardyń zańsyz ıelenuíne qatysty másele qozǵaldy.
Kezdesu qorytyndysy boıynsha ákím tıístí basqarmalar men kommunaldyq qyzmetterge naqty tapsyrmalar berdí. Injenerlík jelílerdí sumen jabdyqtau, káríz jáne jylu júıelerín qalanyń balansyna beru úderísín jedeldetu jónínde sheshím qabyldandy. Qazír jelílerdíń bír bólígí qabyldandy, qalǵany jaqyn kúnderí rásímdeledí. Alǵashqy on bloktyń tūrǵyndary qoǵamdyq kelísímge auystyryldy, qalǵandary boıynsha jūmys bírneshe kún íshínde ayaqtalady.
Polıtsıya tírek punktín «RAMS EVO» tūrǵyn úı keshenínde 2026 jyldyń ekínshí toqsanynda ornatu josparlanyp otyr.
Darhan Satybaldy tūrǵyndardyń barlyq ótíníshín jedel qarap, naqty shara qabyldaudy tapsyrdy.
«Barlyq zańsyz ıelenu toqtatylady. Bíz jūmys tásílín ózgertíp otyrmyz, endí kóshe keshendí túrde «qasbetten qasbetke deıín» ádísí boıynsha tekseríledí. Eger kímde-kím trotuardy nemese ózge aumaqty óz betínshe ıelense, ol nysandar būzylady. Tártíp barlyǵyna bírdeı boluǵa tıís», – dedí qala ákímí.
Sapar sońynda Darhan Satybaldy Medeu audanyn sumen qamtamasyz etetín «Duman» taza su rezervuarynyń qaıta jańǵyrtu barysyn tekserdí. Nysan on jyl būryn salynǵan, bíraq anyqtalǵan aqaularǵa baılanysty álí paıdalanuǵa berílmegen.
Ákím «Almaty Su» AQ men jobalyq ūıymdarǵa jobalyq sheshímderdíń dūrystyǵyn mūqıyat tekseríp, kemshílíkterdí joyu jáne qaıta jańǵyrtu jūmystaryn jedeldetudí tapsyrdy.
Darhan Satybaldy būl jobanyń strategıyalyq mańyzyna toqtalyp, rezervuardyń mańaıynda ornalasqan tūrǵyn úı aımaǵynyń sumen qamtyluyn tūraqtandyruǵa múmkíndík beretínín atap óttí.