23 sáuír elímízde alǵash ret ūlttyq kítap kúní respublıkalyq deńgeıde atap ótíldí. Atauly datany memleket basshysy Qasym-Jomart Toqaev Atyrau qalasynda ótken Ūlttyq qūryltaıda bekítken edí. Osyǵan oraı Aqshamnews.kz tílshísí Qazaqstan Respublıkasy Ūlttyq kítaphanasynyń dırektory Ǵazıza Qūdaıbergenqyzymen tíldesíp, otandyq kítaphanalardyń búgíngí tynysy men bolashaǵy jaıly sūrap bíldí.
Suret: avtordyń jeke arhıvínen
Ūlttyq kítaphanada álemníń 123 tílínde 7 mln astam kítap bar
Ūlttyq kítaphanada búgínde 7 mln. bírlíkten astam álemníń 123 tílíndegí baı kítap qory bar. Onda bílímníń barlyq salasyn qamtıtyn zamanauı qūjattar, qoljazbalyq qūjattar, alǵashqy baspa basylymdarynyń, notaly-muzykalyq basylymdar men kúıtabaqtardyń bíregeı qory jatyr. Ǵazıza Qūdaıbergenqyzy qazír qandaı ádebıetterge sūranys artyp jatqanyn bólístí.
«Qordy ózektí ádebıettermen tolyqtyru – kítaphananyń negízgí basymdyqtarynyń bírí. Oqyrmandardyń aqparatqa erkín jáne shekteusíz qoljetímdílígín qamtamasyz etu maqsatynda kítaphana qory oqyrmannyń talǵamyna saı otandyq jáne sheteldík ózektí tarıhı, ǵylymı, ǵylymı-kópshílík ádebıettermen, sondaı-aq mádenı, ǵylymı jáne kórkem qūndylyǵy joǵary basylymdarmen, basqa da aqparattyq resurstarmen tolyqtyrylady. Ásírese, qordy Qazaqstan turaly jáne odan tys jerlerde shyǵarylatyn Qazaqstan halyqtarynyń tílderíndegí jáne qazaq tílíndegí ádebıettermen tolyqtyruǵa erekshe nazar audarylady» dedí kítaphana basshysy.
Suret: Ūlttyq kítaphana baspasózínen
«Kún saıyn kítaphanaǵa 3-3,5 myńnan astam adam keledí»
Ǵazıza Qūdaıbergenqyzy búgíngí kúngí jastardyń kítapqa degen qyzyǵushylyǵyna baǵa berdí. Onyń sózínshe kópshílík arasynda «jastar kítap oqymaıdy, oquǵa qyzyqpaıdy» degen jańsaq píkír jetedí. Alaıda Ūlttyq kítaphana basshysy būl qaǵıdamen kelíspeıtínín aıtty.
«Kítaphanaǵa asyǵatyn, kítap oquǵa qūmar jastar, oqyrmandar sany kúnnen-kúnge artyp jatyr. Kún saıyn kítaphanaǵa ártúrlí sanattaǵy 3-3,5 myńnan astam oqyrman keledí. Oqyrmandardyń negízgí kontıngentín studentter qūraıdy. Olar negízínen bílím aluy, mamandyǵy boıynsha ádebıettermen jūmys ísteıdí. Oqyrmandar íshínen ǵalymdar men ǵylymı qyzmetkerlerdí, tehnıkalyq qyzmetkerler men ekonomısterdí erekshe atap ótuge bolady. Olardy aınalysyp júrgen ǵylymı-zertteu jūmystaryna, ǵylymı ízdenísterge baılanysty ǵylymı ádebıetter, dıssertatsıyalar men avtoreferattar, monografıyalar, t.b. ǵylymı ádebıetter qyzyqtyrady» deıdí ol.
Sondaı-aq, kítaphana basshysy kelushíler ár túrlí saladan ekenín alǵa tartty. Dese de kítaphana qonaqtarynyń basym kópshílígín studentter qūraıtynyn taǵy da tílge tıek ettí.
«Kítaphanaǵa tírkelgen oqyrman qūramy ár aluan, onda túrlí sala mamandary, ǵylymı qyzmetkerler, oqytushylar, zeınetkerler, medıtsına, tehnıkalyq mamandar, mektep oqushylary bar. Degenmen, negízgí kelushíler, árıne, studentter, olar oqyrman qūramynyń 70 paıyzyn qūraıdy. Kítaphana oqyrmandardyń osy sanatynyń qajettílíkterín qamtamasyz etudíń ınnovatsıyalyq nysandaryn ízdestíru jáne engízu, oqudy zertteu júıesín únemí jetíldíríp otyrady. Studentterge oqu ádebıetí, ǵylymı jáne anyqtamalyq materıaldan tūratyn aqparattar qajet. Sondyqtan da, olardyń oquyna qajettí aqparatty tolyqtaı aluy úshín, bír derekkózdí ǵana paıdalanyp koımaı, bírneshe derekkózden ízdep-tabuyna yqpal etuímíz kerek» deıdí ol.
Oqyrmanǵa qandaı kítap ótímdí?
Ūltyq kítaphana sóresínen oqyrmandar kóbíne mamandyqty meńgeruge jáne kásíptík qyzmetíne baılanysty kítaptardy ízdeıdí. Sondaı-aq, tarıhı jáne ǵylymı-kópshílík, ǵylymı-tanymdyq ádebıetke sūranys joǵary.
«Jastardyń kítap oquynda ískerlík kítaptar da jetekshí oryn alady. Kórkem ádebıetke qyzyǵushylyq tanytqan jas oqyrmandardyń sany da búgínde artuda. Sonymen qatar ózín-ózí damytu, zamanauı tehnologıyalar, jasandy ıntellekt, pánaralyq pánder boıynsha ádebıetterge qyzyǵushylyq tanytady. Qazír qala jastary da, auyl jastary arasynda motıvatsıyalyq, bızneske qatysty ádebıetterge, álemdík bestsellerlerdíń audarmalaryna qyzyǵshylyqtar joǵary. Sonymen qatar psıhologıya, medıtsına, jaratylystanu, t.b ádebıetter sūranysqa ıe» deıdí Ǵazıza Qūdaıbergenqyzy.
Suret: Ūlttyq kítaphana baspasózínen
«Kítaphanalardyń aǵartushylyq rólí erekshe»
Ǵazıza Qūdaıbergenqyzy sońǵy úsh jylda kítaphanaǵa kelushíler sany kóbeımese, azaımaǵanyn aıtty. Ūlttyq kítap kúníníń bekítíluí de kítap pen kítaphanalardyń mańyzyn aıqyndaı túsetínín tílge tıek ettí.
«Sońǵy jyldary kítaphanaǵa kelushíler sany artpasa, azaıǵan joq. Qazírgí tańda oqyrmannyń kítaphana qyzmetíne júgínbeı-aq, Internetten, basqa da aqparattyq resurstardan ózíne qajettí aqparatty aluǵa múmkíndígí mol. Byltyr Ūlttyq qūryltaıda Memleket basshysy Qasym-Jomart Toqaevtyń qoldauymen 23 sáuír – Ūlttyq kítap kúní bolyp bekítílgen bolatyn. Būl kúndí atap ótu – kítaptyń, kítap oqudyń ūlt bolashaǵy úshín qanshalyqty mańyzdy ekendígín kórsetedí. Būl baǵytta qoǵamnyń ruhanı jáne ıntellektualdy áleuetín, olardyń jalpy mádenıetín damytuǵa úles qosyp otyrǵan kítaphanalardyń aǵartushylyq rólí erekshe ekendígí sózsíz» dep túıíndedí sózín Ūlttyq kítaphana basshysy.
