Memleket basshysy Qasym-Jomart Toqaevtyń tapsyrmalaryn júzege asyru ayasynda Premer-mınıstrdíń orynbasary – mádenıet jáne aqparat mınıstrí Aıda Balaeva Úkímettíń 2025 jylǵy jeltoqsanda qabyldaǵan 2030 jylǵa deıíngí Kóshí-qon sayasaty tūjyrymdamasynyń negízgí erejelerín túsíndírdí.
Onyń aıtuynsha, qazírgí zamanda kóshí-qon sayasaty qoǵamdaǵy, ekonomıkadaǵy jáne álemdegí ózgerísterdíń aıqyn kórsetkíshíne aınalyp otyr. Sondyqtan kóptegen elder óz kóshí-qon sayasatyn qaıta qarap jatyr. Qazaqstan da būl baǵytta naqty qadamdar jasap, kóshí-qon júıesín zaman talabyna saı jańartyp keledí. Ol ashyq árí aıqyn bolyp, eń bastysy memleket pen azamattardyń múddesíne qyzmet etuge tıís.
2025 jylǵy jeltoqsanda Úkímet 2030 jylǵa deıíngí kóshí-qon sayasatynyń tūjyrymdamasyn qabyldady. Būl qūjatta ekonomıkanyń qajettílígí, azamattardyń múddesí men ūlttyq qauípsízdík máselelerí jan-jaqty qarastyrylǵan.
Eń aldymen, bíz Qazaqstan azamattarynyń múddesín basshylyqqa alamyz. Sheteldík jūmys kúshí tek naqty kadr tapshylyǵy bar salalarǵa ǵana tartylady. Kóshí-qon baǵyt-baǵdary óńírler men naqty jobalardyń sūranysyna saı qalyptasady, — dedí ol.
Būl rette basty nazar «Zań jáne Tártíp» qaǵıdatynyń saqtaluyna salynatyn bolady.
Zań báríne ortaq. Sondyqtan kóshí-qon talaptaryn būzǵandar jauapkershílíkten syrt aınalyp kete almaıdy. Būl talap mıgranttarǵa da, jūmys berushílerge de bírdeı qoldanylady. Qauípsízdík elge kíruden bastap, elden shyǵuǵa deıín tolyq qamtamasyz etíledí. Bízdíń maqsatymyz – Qazaqstanǵa zańdy syılaıtyn, mádenıetímízdí qūrmetteıtín adamdardyń keluí,— dep atap óttí mınıstr.
2026 jylǵy qańtardan bastap jańa tártíp engízíledí. Shetel azamattary, sonyń íshínde etnıkalyq qazaqtar, aldyn ala íríkteuden ótedí. Oǵan memlekettík tíldí bílu testí, tsıfrlyq saualnama, uákílettí organdardyń tekserulerí jáne áńgímelesu kíredí.
Memlekettík qoldauǵa úmíttí qandastarymyz úshín arnaıy tártíp bar. Memlekettík jeńíldíkter men qoldau baǵdarlamalaryn paıdalanu úshín olar qandas mártebesín rásímdep, eńbek kúshí tapshy óńírlerge qonystanuy kerek. Būl – Aqmola, Abaı, Qostanaı, Pavlodar, Atyrau, Batys, Shyǵys jáne Soltústík Qazaqstan oblystary.
Bíz otandastarymyzdy memlekettík strategıyany ūstanuǵa shaqyramyz. Óńírlík kvotaǵa kírgen qandastar kóshíp kelgen kezde 5 jylǵa áleumettík kelísímshart jasaıdy. Memleket olarǵa kóshuge, baspanaǵa jáne jūmysqa ornalasuǵa kómektesedí. Al eger otbasy bes jyl ótpeı basqa óńírge kóshse, alǵan kómektí qaıtaruǵa tıís bolady,— dep túsíndírdí Aıda Balaeva.
Sonymen qatar balama jol da bar. Yaǵnı, memlekettík qoldausyz, jalpy tártíppen tūraqty tūruǵa rūqsat alu. Būl jaǵdaıda óńírdí óz qalauyńyzsha tańdaı alasyz. Mınıstrdíń aıtuynsha, jańa kóshí-qon sayasaty kezeń-kezeńímen engízíledí. Qoǵamnyń, bıznestíń jáne óńírlerdíń píkírí eskeríledí. Zańdy qūrmetteıtín, adal azamattarǵa árdaıym basymdyq beríledí. Tsıfrlyq qūraldar zańsyz áreketter men jalǵan qūjattardy joyuǵa múmkíndík beredí.
Kóshí-qon máselesí zańdy, qauípsíz árí baqylauda boluǵa tıís. Tek sonda ǵana ol memleketímíz ben azamattarymyzdyń múddesíne saı keledí,— dep túıíndedí ol.