«Ádílet» partıyasynda «Quatty óńírler – quatty el» atty strategıyalyq sessıya óttí. Onda sarapshylar, memlekettík organdar men bıznes qauymdastyǵynyń ókílderí Qazaqstan óńírlerín damytuǵa qatysty ūsynystardy talqylady, – dep habarlaıdy aqshamnews.kz tílshísí.
Jıynnyń negízgí taqyryptary aımaqtar arasyndaǵy aıyrmashylyqty azaıtu, ınvestıtsıya tartu, tūrǵyn úı-kommunaldyq sharuashylyǵyn jańǵyrtu, sondaı-aq auyldyq aumaqtardy damytu, ekologıya jáne energetıka máseleleríne arnaldy.
Sessıya barysynda sóz sóılegen «Ádílet» partıyasy Sayası keńesí byurosynyń múshesí Rauan Kenjehanūly óńírlík damu máselelerín búgínde tek ekonomıkalyq kórsetkíshter arqyly ǵana emes, qabyldanǵan sheshímderdíń halyqtyń kúndelíktí tūrmysyna qanshalyqty oń áser etíp otyrǵany tūrǵysynan da baǵalau qajet ekenín atap óttí.
«Óńírlerdíń damuyn tartylǵan ınvestıtsıya kólemímen nemese júzege asqan jobalar sanymen ǵana emes, árbír qala, audan men auyldaǵy tūrǵyndardyń ómír súru sapasynyń naqty jaqsaruymen baǵalau mańyzdy», - dedí ol.
Ūlttyq ekonomıka vıtse-mınıstrí Asan Darbaev óńírlerdíń damuyndaǵy teńsízdíktí qysqartuǵa baǵyttalǵan memlekettík sayasattyń negízgí baǵyttaryna toqtaldy. Onyń aıtuynsha, 2025 jyldyń qorytyndysy boıynsha Óńírlík standarttar júıesí ayasynda eldí mekenderdíń ınfraqūrylymdyq nysandarmen jáne qyzmettermen qamtylu deńgeıí 68 paıyzǵa jetken. Degenmen qala men auyl arasyndaǵy aıyrmashylyq álí de baıqalady. Būl ınfraqūrylymdy odan árí damytyp, bazalyq qyzmetterdí alu múmkíndígín keńeıtudí talap etedí.
Píkírtalas barysynda qatysushylar óńírlerdíń teń dárejede damuyna yqpal etetín qosymsha tetíkterdí talqylady. Ulagat Consulting Group dırektory Marat Qaıyrlenov óńírlerge ınvestıtsıya tartuǵa qolaıly jaǵdaı qalyptastyrudyń mańyzdylyǵyna toqtaldy. Al Qaraǵandy oblysy basqarushy jáne servıstík kompanıyalar qauymdastyǵynyń tóraıymy Irına Yurtanova tūrǵyn úı qoryn basqaru júıesín jetíldíru jáne ınjenerlík ınfraqūrylymdy damytu jóníndegí ūsynystaryn ortaǵa saldy.
Basqosu barysynda auyldyq aumaqtardy damytu, agroónerkásíp keshenín qoldau, sondaı-aq ekologıya men energetıka salasyndaǵy ózektí máselelerge de erekshe nazar audaryldy.
Jıyndy qorytyndylaǵan Rauan Kenjehanūly memlekettík óńírlík sayasattyń basty ólshemí onyń naqty nátıjesí boluy tıís ekenín atap óttí. Sessıyaǵa qatysushylar túsken ūsynystardy jınaqtap, olardy óńírlík sayasatty jetíldíru máselelerín talqylau barysynda qarastyru turaly kelísímge keldí.