Jábírlenushílerge keltírílgen jalpy shyǵyn 19,8 mln teńgeden asty, dep habarlaıdy aqshamnews.kz tílshísí.
Abaı oblysynda Jarma audanynda polıtseıler írí qara mal ūrlyǵyna qatysty bírqatar qylmystyń betín ashty. Tergeu barysynda alty epızodqa segíz adamnyń qatysy bary anyqtaldy. Jábírlenushílerge keltírílgen jalpy shyǵyn 19,8 mıllıon teńgeden asty.
2025 jyldyń qyrkúıek aıynda Suyqbūlaq auylynyń mańynda maldyń joǵalǵany turaly polıtsıyaǵa aryzdar túse bastaǵan. Ártúrlí uaqytta sharua qojalyqtary men jeke tūrǵyndarǵa tıesílí mal ūrlanǵan.
Audandyq polıtsıya bólímíníń qyzmetkerlerí sotqa deıíngí tergep-tekserudí bastady. Polıtseıler maldyń joǵalu mán-jaıyn anyqtap, beınebaqylau kameralaryndaǵy jazbalardy zerdeledí, sondaı-aq jedel ízdestíru jáne tergeu sharalaryn júrgízdí. Tergeudegí mańyzdy aıǵaqtardyń bírí jeke tūrǵyn úı aulasynda írí qara maldyń soıylǵan sátí túsírílgen beınejazba boldy. Jazbany zerdelep, alynǵan málímetterdí tekseru nátıjesínde kúdíktíler anyqtaldy.
Júrgízílgen ís-sharalar nátıjesínde segíz adam ūstaldy. Alǵashqy derek boıynsha tergeu jūmystaryn jalǵastyrǵan polıtseıler mal ūrlyǵynyń taǵy bes epızodyn anyqtady. Jalpy, tergeu barysynda 52 bas írí qara maldyń ūrlanǵany dáleldendí. Keltírílgen shyǵyn kólemí 19,8 mln teńgeden asqan.
Tergeu ayaqtalǵannan keıín qylmystyq ís sotqa joldandy. Jarma audandyq sotynyń úkímímen kínálíler bas bostandyǵynan aıyryldy.
Polıtsıya mal ıeleríne tórt túlíktíń jaıylymdaǵy qozǵalysyn baqylap, maldyń bar-joǵyn uaqytyly tekseríp otyrudy jáne joǵalǵan jaǵdaıda dereu "102" nómíríne habarlasudy eskertedí.