Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
Álem chempıonaty: 10 medal, onyń jeteýi - altyn
Qazaqstan quramasy Lıverpýlde ótken bokstan álem chempıonatynda 10 medal jeńip aldy, onyń jeteýi - altyn. Nátıjesinde otandastarymyz jalpykomandalyq esepte birinshi orynǵa jaıǵasty (jeti altyn, bir kúmis jáne eki qola).
Qazaqstan quramasy álem chempıonatyn jeti altyn medalmen aıaqtady:
- Birinshi oryn ıelengender: Alýa Balqybekova (51 kelige deıin), Sanjar Táshkenbaı (50 kelige deıin), Mahmud Sabyrhan (55 kelige deıin), Aıda Ábikeeva (65 kelige deıin), Natalá Bogdanova (70 kelige deıin), Tórehan Sabyrhan (70 kelige deıin), Aıbek Oralbaı (90 keliden joǵary) .
- Nazym Qyzaıbaı (48 kelige deıin) kúmis júldeger atandy. Vıktorıa Grafeeva (60 kelige deıin) men Eldana Tálipova (80 keliden joǵary) qola júlde enshiledi.
200-den asa jobaǵa 1,2 trln teńge bólinedi
Qazaqstanda úsh jyldyq kezeńde jalpy somasy 1,2 trln teńge bolatyn 200-den asa joba qarjylandyrylatyn bolady. Bul týraly premer-mınıstrdiń orynbasary – ulttyq ekonomıka mınıstri Serik Jumanǵarın Memleket basshysynyń Joldaýyn júzege asyrý jónindegi Jalpyulttyq jospardy tanystyrý kezinde habarlady.
Agroónerkásiptik keshendegi ınvestısıalarǵa tapsyrys" bastamasy aıasynda 5%-dyq jeńildetilgen kredıt berý baǵytyn keńeıtý josparlanýda, al "Damý" qory agrobıznestiń qaryzdaryna 80%-ǵa deıin kepildik beretin bolady.
Qazaqstandaǵy eń joǵary zeınetaqy - 993 myń teńge
2025 jylǵy 1 tamyzdaǵy jaǵdaı boıynsha Qazaqstanda jas boıynsha beriletin aılyq ortasha tólem – nebári 35,7 myń teńge. Degenmen, eń joǵarǵy somaǵa shekteý qoıylmaǵan, keıbir azamattardyń zeınetaqysy 900 myń teńgeden asady.
Qazaqstandaǵy eń joǵarǵy 5 zeınetaqy tólemi (2025 jylǵy 1 qyrkúıekke):
-
993 041 teńge
-
818 818 teńge
-
635 236 teńge
-
565 857 teńge
-
560 437 teńge
Mektep mańyndaǵy baǵdarshamdar men jol belgileri
İshki ister mınıstriniń orynbasary Igor Lepeha Úkimet otyrysynda bilim berý nysandarynyń mańyna qajetti jol ınfraqurylymdaryn ornatýdy qadaǵalaý jumystary týraly baıandady. Ol bul másele erekshe baqylaýda ekenin atap ótti.
Mektepterdiń mańynda 54 jaıaý júrginshiler baǵdarshamy, 1 myńnan astam jasandy kedergi, 8 myńǵa jýyq jol belgisi men aqparattyq panno, 180 shaqyrym qorshaý ornatylyp, 248 avtoturaq salynǵan.
"Alaıda, respýblıka boıynsha áli de 70 retteletin jaıaý júrginshiler baǵdarshamy, 350-ge jýyq jasandy kedergi jáne 400 jol belgisi qajet", — dedi Igor Lepeha.