Eńbek jáne halyqty áleumettík qorǵau mınıstrlígí eń joǵary jalaqy tólenetín jáne eń kóp sūranysqa ıe mamandyqtar turaly derekterdí jarıyalady, - dep habarlaıdy aqshamnews.kz tílshísí.
2025 jylǵy qazanda Enbek.kz elektron eńbek bırjasynda jūmys berushíler tarapynan 132 myń bos jūmys orny men 114,1 myń túıíndeme jarıyalanǵan.
Jūmys berushíler ūsynǵan eń joǵary eńbekaqy deńgeılerí:
- óndírís bastyǵynyń orynbasary (~1 mıllıon teńge),
- kompyuterlík oıyndar dızaınerí (~990 myń teńge)
- ombudsmen (~990 myń teńge) lauazymdary boıynsha tírkelgen.
"Al eń joǵary eńbekaqy sūraǵandar: kommertsıyalyq áue laıneríníń ūshqyshy (~2,8 mıllıon teńge), órttíń aldyn alu jáne sóndíru jóníndegí kenshí (~2 mıllıon teńge) jáne basqarma tóraǵasynyń orynbasary (~1,8 mıllıon teńge). Ūsynylǵan jáne kútíletín eńbekaqy deńgeılerí arasyndaǵy alshaqtyq álí de saqtalǵan, ásírese basqarushylyq jáne tehnıkalyq segmentterde", - delíngen habarlamada.
Bos jūmys oryndarynyń sany boıynsha bílím beru salasy kósh bastap tūr – 41,1 myń (31 paıyz), odan keıín ártúrlí qyzmet kórsetu túrlerí – 17,5 myń (13 paıyz) jáne densaulyq saqtau men halyqty áleumettík qorǵau salasy – 11,7 myń (9 paıyz). Būl salalar jıyntyq túrde barlyq bos oryndardyń shamamen jartysyn qūrap, áleumettík sektordyń jūmyspen qamtudy qamtamasyz etudegí mańyzdy rólín aıqyndaıdy.
Qazanda eń kóp sūranysqa ıe mamandyqtardyń qatarynda joǵary bílíktílík talap etetín qyzmetter:
- tárbıeshíler (1,8 myń bos oryn),
- buhgalterler (1,1 myń)
- matematıka mūǵalímderí (1 myń) basym bolǵan.
Qazanda jūmys berushíler kóbíne orta deńgeılí bílíktílíkke ıe mamandardy ízdedí – 64,4 myń bos oryn. Būdan sál az – joǵary bílíktí (34,7 myń) jáne bílíktílígí joq (32,9 myń) mamandarǵa arnalǵan oryndar bolǵan.
"Eń kóp bos jūmys oryndary Túrkístan oblysynda (12 myń), Astanada (11,4 myń) jáne Jambyl oblysynda (8,8 myń) jarıyalanǵan. Al túıíndemeler sany boıynsha kóshbasshylar qatarynda Túrkístan oblysy (13,4 myń), Astana (9,1 myń) jáne Qyzylorda oblysy (8,3 myń) tūr", - delíngen habarlamada.
Jas qūrylymy tūrǵysynan barlyq túıíndemeníń jartysyna juyǵy (51,4 myń nemese 45 paıyzy) 34 jasqa deıíngí azamattar tarapynan ornalastyrylǵan. 35–44 jas aralyǵyndaǵy ízdenushíler 26 paıyz (29,2 myń), 45–54 jas aralyǵyndaǵy top 19 paıyz (21,8 myń), al 55 jastan asqandar 10 paıyz (11,7 myń) bolady. Áıelder dástúrlí túrde belsendírek bolyp qala beredí – olardyń úlesíne barlyq túıíndemelerdíń 52 paıyzy tıesílí.