Ekonomıkanyń ósuí mūnaıdan tys sektorlardaǵy óndírístí ūlǵaıtu arqyly qamtamasyz etílmek, dep habarlaıdy aqshamnews.kz tílshísí.
Premer-mınıstr Oljas Bektenovtíń tóraǵalyǵymen ótken Úkímet otyrysynda Áleumettík-ekonomıkalyq damu boljamy jáne 2027–2029 jyldarǵa arnalǵan respublıkalyq byudjet jobasy maqūldandy. Negízgí basymdyqtar makroekonomıkalyq tūraqtylyqty saqtau, áleumettík míndettemelerdí oryndau, ekonomıkalyq ósímdí yntalandyru jáne ınfraqūrylymdyq jáne áleumettík nysandardy ozyq qarqynmen salu bolyp aıqyndaldy.
Premer-mınıstrdíń orynbasary – ūlttyq ekonomıka mınıstrí Serík Jūmanǵarın Áleumettík-ekonomıkalyq damu boljamy turaly bayandama jasady. Inflyatsıya, tólem balansy jáne Ūlttyq qor máselelerí boıynsha Ūlttyq banktíń tóraǵasy Tımur Súleımenov sóz sóıledí. 2027–2029 jyldarǵa arnalǵan respublıkalyq byudjettíń jobasy turaly qarjy mınıstrí Mádı Takıev bayandady.
Premer-mınıstrdíń orynbasary – ūlttyq ekonomıka mınıstrí Serík Jūmanǵarın óz bayandamasynda otyrystyń kún tártíbíne 2027-2029 jyldarǵa arnalǵan Áleumettík-ekonomıkalyq damu boljamynyń jobasy engízílgenín habarlady.
«Boljam álemdík ekonomıka jáne syrtqy naryqtardaǵy konyunktura boıynsha boljamdardy eskere otyryp qalyptastyryldy. Halyqaralyq valyuta qorynyń shílde aıyndaǵy jańartylǵan boljamyna sáıkes 2027 jyly álemdík ekonomıkanyń ósuí 3,4%-dy qūraıdy. Halyqaralyq ūıymdar men jahandyq ınvestıtsıyalyq bankter 2027 jylǵa mūnaı baǵasy boıynsha boljamdaryn tómendettí. Konsensus boljam 1 barelíne $73 deıín tómendetíldí. Osyny eskere otyryp bazalyq nūsqadaı mūnaı baǵasy barelíne $70 deńgeıínde alyndy.
Syrtqy syn-qaterlerdíń saqtaluyna qaramastan, Qazaqstan ekonomıkasy ósuín jalǵastyruda. Bazalyq nūsqaǵa sáıkes 2027 – 2029 jyldary jalpy íshkí ónímníń naqty ortasha jyldyq ósuí 5%-dan joǵary deńgeıde boljanuda, máselen, 2027 jyly – 5,3%, 2028 jyly – 5,5%, 2029 jyly – 5,4%. Nomınaldy jalpy íshkí óním 2027 jyly 199,3 trln teńgeden 2029 jyly 245 trln teńgege deıín ósedí», — dedí ol.
Onyń aıtuynsha, ekonomıkanyń ósuí mūnaıdan tys sektorlardaǵy óndírístí ūlǵaıtu arqyly qamtamasyz etílmek. Óńdeu ónerkásíbíníń ortasha jyldyq ósu qarqyny (5,9%) tau-ken ónerkásíbíníń ósu qarqynynan (2,0%) joǵary bolady. Óńdeu ónerkásíbíníń ósuíne metallurgıya, mashına jasau, qūrylys materıaldaryn óndíru, hımıya ónerkásíbí, tamaq ónímderín óndíru negízgí úles qosady.
Ekonomıkanyń ósu draıverleríníń bírí – auyl sharuashylyǵy. Onyń jyl saıynǵy ortasha ósuí kemínde 5%-dy qūraıdy.
Qūrylysta ósu qarqyny 2027 jyly 16%-dan 2029 jyly 17,3%-ǵa deıín artady dep boljanuda. Būǵan kólíktík-logıstıkalyq, energetıkalyq jáne su ınfraqūrylymyn odan árí damytu jóníndegí jobalardy josparly júzege asyru, sondaı-aq tūrǵyn úı-kommunaldyq jáne áleumettík-ınfraqūrylymdy jańǵyrtu yqpal etetín bolady.
Qyzmet kórsetu salasynda da tūraqty serpín saqtalady. Sauda orta eseppen jylyna 5,7%-ǵa, kólík jáne qoımalau 10,4%-ǵa, aqparat jáne baılanys 9,2%-ǵa ósedí.
«Oń sauda balansy saqtalady. Tauarlar eksporty boljam boıynsha 2027 jyly $82,8 mlrd-tan 2029 jyly $88,5 mlrd-qa deıín ósedí, ımport – $80,5-ten $88,4 mlrd-qa deıín.
Inflyatsıyanyń boljamdy dálízí 2027 jyly 7,5-9,5 %, 2028-2029 jyldary 6-8% deńgeıínde anyqtalǵan.
Makro boljamnyń negízínde respublıkalyq byudjettíń kírísterí, transfertterdí eseptemegende, boljam boıynsha 2027 jyly – 19,9 trln teńgení, 2028 jyly – 21,7 trln teńgení, 2029 jyly – 23,4 trln teńgení qūraıdy», — dedí vıtse-premer.
Kepíldendírílgen transfert byudjet erejesín eskere otyryp 2027-2028 jyldary 2 trln 430 mlrd teńge jáne 2029 jyly 2 trln teńge kólemínde aıqyndaldy. Sondaı-aq asa mańyzdy nysandar men jalpy el úshín mańyzy bar jobalardy qarjylandyruǵa Ūlttyq qordan 2027 jyly 2 trln teńge jáne 2028-2029 jyldary ár jylǵa 1,5 trln teńgeden nysanaly transfert qarastyrylǵan.
Memlekettík qarjynyń tūraqtylyǵyn qamtamasyz etu maqsatynda byudjet tapshylyǵy 2027 jyly jalpy íshkí ónímge qatysty 2,3% deńgeıínde belgíleníp, 2029 jyly jalpy íshkí ónímge qatysty 0,4%-ǵa deıín tómendeıdí. Mūnaıdan tys tapshylyq Jalpy íshkí ónímge qatysty 5,3%-dan 2,5%-ǵa deıín qysqarady. Osyny eskere otyryp, respublıkalyq byudjettíń shyǵystary 2027 jyly 30,2 trln teńgení, 2028 jyly 29,4 trln teńgení jáne 2029 jyly 29,6 trln teńgení qūraıdy.
«Ūlttyq qordaǵy jınaqtardyń ūlǵayuy boljanuda. Bazalyq stsenarıı kezínde Ūlttyq qorǵa túsímderdíń jalpy kólemí 2027 jyly 5,1 trln teńge, 2028 jyly 5,5 trln teńge jáne 2029 jyly 5,7 trln teńge deńgeıínde boljanuda. Ūlttyq qorǵa taza túsímder 2027 jyly 0,5 trln teńge, 2028 jyly 1,4 trln teńge jáne 2029 jyly 2,0 trln teńge mólsherínde kútíledí. Ūlttyq qordyń valyutalyq aktıvterí 2027 jyly $65,2 mlrd-tan 2029 jyly $70,6 mlrd-qa deıín ósedí dep boljanuda.
2027 – 2029 jyldarǵa arnalǵan Áleumettík-ekonomıkalyq damu boljamynyń jobasyn qoldaudy sūraımyn», — dedí Premer-mınıstrdíń orynbasary – ūlttyq ekonomıka mınıstrí Serík Jūmanǵarın.