Memleket basshysynyń tapsyrmasy boıynsha Densaýlyq saqtaý mınıstrligi pasıentke baǵdarlanǵan, medısınalyq kómektiń qoljetimdiligi men sapasyn arttyrýǵa baǵyttalǵan salany jańǵyrtý jáne damytý jónindegi is-sharalar keshenin júzege asyrýda.
Bul týraly densaýlyq saqtaý birinshi vıse-mınıstri Tımýr Sultanǵazıev málimdedi, - dep habarlaıdy Aqshamnews.kz.
Onyń aıtýynsha, Prezıdent tarapynan dáıekti qoldaýdyń arqasynda densaýlyq saqtaý salasyna jumsalatyn memlekettik shyǵyndar sońǵy jyldary úsh esege jýyq ósip, 2025 jyly 3 trln teńgege jetken. Bul medısınalyq kómektiń kólemin edáýir keńeıtýge, ınfraqurylymdy aýqymdy túrde jańǵyrtýǵa jáne medısınalyq uıymdardyń materıaldyq-tehnıkalyq bazasyn jańartýǵa múmkindik berdi.
Máselen, respýblıkalyq mańyzy bar negizgi nysandar paıdalanýǵa berildi. Olar – Ulttyq onkologıa ortalyǵy, Astanadaǵy shuǵyl medısına ortalyǵy, sondaı-aq Almatydaǵy Ulttyq juqpaly aýrýlar ortalyǵy.
Memleket basshysynyń tapsyrmasy boıynsha júzege asyp jatqan aýyldyq densaýlyq saqtaý salasyn jańǵyrtý jónindegi aýqymdy joba aıaqtalýda. Qazirdiń ózinde aýyldyq jerlerde 650-den astam medısınalyq nysan paıdalanýǵa berildi, bul qala men aýyl arasyndaǵy alshaqtyqty edáýir azaıtty, - dep atap ótti Tımýr Sultanǵazıev.
Uzaq ýaqyttan beri alǵash ret tarıftik saıasat qaıta qaraldy: bosandyrý jáne pedıatrıa tarıfteri kóterildi, aýrýlardyń aldyn alýǵa, erte dıagnostıkalaýǵa jáne medısınalyq qyzmetterdiń sapasyn arttyrýǵa basa nazar aýdaryldy. Klınıkalyq baǵyttarda eleýli progreske qol jetkizildi, ana men balanyń densaýlyǵyn saqtaý júıesi nyǵaıtyldy. Onkologıalyq qyzmet belsendi damyp keledi, buryn negizinen shetelde qol jetimdi bop kelgen joǵary dáldiktegi jáne jumsaq emdeý ádisteri engizilýde.
Dárilik saıasatqa degen jańasha kózqaras dári-dármekpen qamtamasyz etýdiń turaqtylyǵyn arttyryp, búdjet qarajatyn aıtarlyqtaı únemdeýge múmkindik berdi. Memleket basshysynyń Qazaqstan halqyna Joldaýynda belgilep bergen strategıalyq basymdyq retinde sıfrlandyrýǵa erekshe nazar aýdarylady.
Salada "eDensaulyq" ekojúıesi qalyptasyp keledi, dárigerdi qoldaý jáne medısınalyq kómektiń sapasyn arttyrý quraly retinde jasandy ıntellekt negizindegi sheshimder engizilýde, - dep atap ótti birinshi vıse-mınıstr.
Sonymen qatar Parlament Memleket basshysynyń tapsyrmasy boıynsha ázirlengen medısına qyzmetkerlerin qorǵaý týraly zańnamaǵa engizilgen túzetýlerdi maquldady. Qyzmettik mindetterin atqarý kezinde medısına qyzmetkerleri men jedel járdem júrgizýshilerine qatysty jasalǵan zorlyq-zombylyq úshin jeke qylmystyq jaýapkershilik engizilip jatyr, sondaı-aq dárigerlerdiń kásibı jaýapkershiligin saqtandyrý tetigi iske qosyldy. Áleýmettik qoldaý sharalarynyń arqasynda dárigerlerdiń tapshylyǵy 19%-ǵa, orta medısınalyq personal 7%-ǵa, aýyldyq jerlerde 16%-ǵa tómendedi.
2026 jyldan bastap ınfeksıalyq qyzmetter men jedel medısınalyq járdem qyzmetkerleriniń jalaqysyn arttyrý qarastyrylǵan, al dárigerlerge qatysty zorlyq-zombylyq úshin jaýapkershilik kúsheıtiledi. Saqtandyrý modeline kóshýdi, halyqty qamtý kólemin keńeıtýdi jáne medısınalyq qyzmetter sapasyn memlekettik baqylaýdy qalpyna keltirýdi kózdeıtin Mindetti áleýmettik medısınalyq saqtandyrý júıesin jetildirý jónindegi zań qabyldandy, - dedi Tımýr Sultanǵazıev.
Salany damytýdyń strategıalyq basymdyqtary aıqyndaldy: Densaýlyq saqtaýdy damytýdyń 2029 jylǵa deıingi tujyrymdamasy jáne Medısınalyq kómektiń sapasyn basqarýdyń keshendi jospary ázirlendi.
Birinshi vıse-mınıstr atap ótkendeı, qabyldanyp jatqan sharalar aıtarlyqtaı nátıje bere bastady. Máselen, halyqtyń boljamdy ómir súrý uzaqtyǵy 75,8 jyldy quraıdy, ólim-jitim kórsetkishteri tómendeýde. Jalpy ólim-jitim 2,6%-ǵa, náreste ólimi 18%-ǵa qysqardy, al Qazaqstan halyqaralyq reıtıńterdegi óz pozısıasyn jaqsarta otyryp, adam damýy ındeksinde jeti tarmaqqa kóterildi.