Алматы қаласы әкімдігінде Алматы қаласы әкімінің орынбасары Абзал Нүкеновтің төрағалығымен Өңірлік есірткіге қарсы штабтың кезекті отырысы өтті, – деп хабарлайды aqshamnews.kz тілшісі.
Отырыста кәмелетке толмағандарды есірткінің заңсыз айналымына тартудың алдын алу, сондай-ақ жасөспірімдер мен жастар арасында есірткі құқық бұзушылықтарының профилактикасын күшейту мәселелері қаралды.
Штаб жұмысына ҚР ІІМ Есірткі қылмысына қарсы іс-қимыл комитетінің, прокуратураның, ҰҚКД, Психикалық денсаулық орталығының, Білім басқармасының, Жастар саясаты басқармасының, Алматы қаласы ПД Есірткі қылмысына қарсы іс-қимыл басқармасының, Фармацевтикалық бақылау департаментінің өкілдері, сондай-ақ қаланың сегіз ауданы әкімдерінің орынбасарлары қатысты.
Қатысушылар жүргізіліп жатқан профилактикалық жұмыстардың нәтижелерін, қауіп факторларын анықтау, мемлекеттік органдар, білім беру ұйымдары мен аудан әкімдіктерінің өзара іс-қимылын жетілдіру мәселелерін талқылады.
Әлеуметтік желілер мен ақпараттық-коммуникациялық технологияларды пайдалана отырып, кәмелетке толмағандарды есірткінің заңсыз айналымына тартуға байланысты жаңа қауіп-қатерлерге ерекше назар аударылды. Атап айтқанда, жасөспірімдерді есірткі таратуға және курьер ретінде пайдалануға тарту әрекеттері сөз болды.
Осыған байланысты есірткі өткізушілердің теріс ықпалына тап болған жасөспірімдерді дер кезінде анықтап, олардың құқыққа қайшы әрекетке баруына жол бермей, алдын ала тиісті шаралар қабылдаудың маңызы зор.
Отырыс қорытындысы бойынша кәмелетке толмағандар арасындағы профилактикалық жұмысты күшейту, ведомствоаралық өзара іс-қимылдың тиімділігін арттыру және жасөспірімдердің есірткі қылмысына тартылуына жол бермеу бойынша қосымша шаралар айқындалды.