«Жаңа ғасыр» театрына қазақ театр және кино өнерінің абызы, КСРО және Қазақстанның халық артисі, Қазақстанның Еңбек Ері Асанәлі Әшімұлының есімі ресми түрде берілді, – деп хабарлайды aqshamnews.kz тілшісі.
Мәдениет пен өнер саласында айтулы оқиға болды. Бұдан былай өнер ордасы «Асанәлі Әшімов театры» деп аталады.
Бұл бастама ұлттық мәдениеттің дамуына өлшеусіз үлес қосқан тұлғаның шығармашылық мұрасын ұлықтау және өскелең ұрпаққа рухани құндылықтарды насихаттау мақсатында жүзеге асырылды. Асанәлі Әшімовтың сахна мен экрандағы қолтаңбасы, жоғары кәсіби шеберлігі мен ұстаздық жолы қазақ өнерінің алтын қорына енген.
Театр ұжымы жаңа атау үлкен жауапкершілік пен жаңа белестің бастауы екеніне тоқталды. Осыған орай, театрдың жаңа брендингін қалыптастыру мақсатында «Үздік логотип» байқауы жарияланды.
«Үздік логотип» байқауы
Байқаудың мақсаты – театрдың бірегей стилін айқындайтын, заманауи әрі есте қаларлық логотипті анықтау. Ұйымдастырушылар креативті ойлайтын, тың идея ұсынуға дайын барша жанды байқауға шақырады.
Шарттары:
- Логотип авторлық және бірегей болуға тиіс;
- Асанәлі Әшімовтың арнайы қолтаңбасы болуы керек;
- Мекеме қызметін толық бейнелеуі қажет;
- Жұмыс сапалы форматта (PNG, JPEG, PDF) қабылданады;
- Бір қатысушы бірнеше жұмыс ұсына алады.
Материалдар байқау жарияланған күннен бастап 1 мамырға дейін қабылданады.
WhatsApp: +7 701 712 2087
Email: press@almaty-ayenderi.kz