15 сәуір күні Алматы қаласының Білім басқармасы Өңірлік коммуникациялар қызметімен мегаполистің үш жетекші колледжіне, WorldSkills Almaty–2026 өңірлік кезеңінің жеңімпаздарын Астанада өтетін WorldSkills Kazakhstan–2026 республикалық чемпионатына даярлау барысына арналған пресс-тур ұйымдастырды, – деп хабарлайды aqshamnews.kz тілшісі.
«WorldSkills өңірлік кезеңі жеңімпаздарын республикалық чемпионатқа дайындау – тек кәсіби дағдыларды жетілдіру ғана емес. Бұл – қаланың адами капиталына бағытталған стратегиялық инвестиция.
Алматы қаласының Білім басқармасында «Бүгінде колледж студенттерінің ең заманауи құзыреттерді меңгеріп жатқанын көріп отырмыз, бұл Қазақстан Президенті Қасым-Жомарт Тоқаев жариялаған Цифрландыру және жасанды интеллект жылының міндеттерімен тікелей үндеседі», – деді Білім басқармасының стратегия және кәсіптік білім беру бөлімінің басшысы Ерік Әбішаев.
Журналистер мен блогерлерге заманауи білім беру технологиялары таныстырылды. Іс-шара техникалық және кәсіптік білім беру (ТжКБ) жүйесінің беделін арттыруға, сондай-ақ колледждердің цифрландыру мен инновацияларды енгізу бағытына сәйкес қала және ел экономикасы үшін кадрлар даярлаудағы үлесін көрсетуге бағытталды.
Бұл күні колледждер «Сандық бағдарламалық басқару (CNC) станоктарындағы фрезерлік жұмыстар», «Ақпараттық-коммуникациялық технологиялар (АКТ) желілерінің инфрақұрылымы» және «Бастауыш сыныптарда оқыту» құзыреттері бойынша студенттерді даярлау процесін көрсетті.
Алматы жолаушылар көлігі және технологиялар колледжі: токарлық және фрезерлік жұмыстар шеберлігі
Бағыттың алғашқы нүктесі «ЧПУ станоктарындағы токарлық жұмыстар» және «ЧПУ станоктарындағы фрезерлік жұмыстар» құзыреттері бойынша өңірлік чемпионат жеңімпазы – Алматы жолаушылар көлігі және технологиялар колледжі болды. Колледж базасында көлік, машина жасау және энергетика салалары бойынша 6 мамандықта оқыту жүргізілетін заманауи Құзыреттер орталығы жұмыс істейді.
Журналистерге жүлдегерлер – 1-курс студенттері Ламина Аминова мен Милана Димитрова, сондай-ақ 2-курс студенті Илья Бабоевтің дайындық барысы көрсетілді. Болашақ токарьлар CAD/CAM жүйелерінде бағдарламалау дағдыларын және жоғары дәлдіктегі жабдықтармен жұмыс істеу шеберлігін көрсетті.
«WSA-2026-дағы жеңіс мен үшін табандылық пен мамандыққа деген сүйіспеншіліктің жоғары нәтижеге жеткізетінінің дәлелі болды. Қазір мен Шанхайға дайындалып жатырмын, біздің токарлық мектептің әлемдегі ең мықтылардың бірі екенін дәлелдегім келеді», – деді Ламин Аминов.
«Біздің студенттердің жоғары нәтижелері кездейсоқ емес. Оның артында күнделікті еңбек, тәртіп және мамандыққа деген шынайы қызығушылық жатыр. Олардың жетістігі – жүйелі жұмыстың және нағыз кәсіби маман болуға деген зор ұмтылыстың нәтижесі», – деп атап өтті колледж директоры Сейтбек Сүлейменов.
Алматы телекоммуникация және машина жасау колледжі: АКТ желілері инфрақұрылымы
Алматы телекоммуникация және машина жасау колледжінде «АКТ желілерінің инфрақұрылымы» құзыреті бойынша жеңімпаз дайындалуда. Оқу орнында құны 1,8 млрд теңге болатын жабдықтармен қамтамасыз етілген Құзыреттер орталығы бар.
Өңірлік кезең жүлдегері, 2-курс студенті Максим Нехайчик пресс-тур барысында маршруттауды баптау мен ақпараттық қауіпсіздікті қамтамасыз ету процесін іс жүзінде көрсетті. Қазіргі уақытта ол республикалық кезеңге қарқынды дайындық жүргізуде.
«АКТ желілерінің инфрақұрылымы» құзыреті тек білімді ғана емес, практикалық тәжірибені де талап етеді. Өңірлік кезең маған сенімділік берді, енді республикалық деңгейде одан да жоғары нәтиже көрсетуге дайындалып жатырмын. Қазіргі цифрландыру дәуірінде мұндай дағдылар жастардың табысқа жетуіне мүмкіндік береді», – деді Максим Нехайчик.
«АКТ саласы мамандарын даярлау – колледжіміздің басым бағыттарының бірі. Өңірлік чемпионаттағы нәтиже білім алушылардың даярлық деңгейінің жоғары екенін және құрылған білім беру ортасының тиімділігін дәлелдейді. Біз еңбек нарығында бірден сұранысқа ие кадрларды даярлаймыз», – деп мәлімдеді колледж директоры Ардак Қоджахметова.
№1 Алматы қазақ гуманитарлық-педагогикалық колледжі: бастауыш сыныптардағы оқыту
Пресс-турдың қорытынды кезеңі «Бастауыш сыныптарда оқыту» құзыреті бойынша жеңімпаз №1 Алматы қазақ гуманитарлық-педагогикалық колледжіне барумен аяқталды. 1978 жылдан бастау алатын бұл оқу орны бүгінде 4K моделін дамытуға басымдық береді: креативтілік, сыни ойлау, коммуникация және командалық жұмыс.
Өңірлік кезеңде І орынды иеленген 3-курс студенті Қарақат Туляубай журналистермен болашақтағы оқушыларды оқытудағы өз тәсілімен бөлісті.
«Маған табысқа жетуге әрбір педагог балалардың бойында білімге деген сүйіспеншілікті оята алады деген шынайы сенім көмектесті. Біз тек өз колледжімізді ғана емес, мектептерге апаратын игі миссиямызды да таныстырамыз. Жеңіс – өз шәкірттеріне үздік тәлімгер болуға деген ұмтылыстан басталады», – деді Қарақат Туляубай.
«Біздің мақсатымыз – жаңа технологиялармен жұмыс істей алатын және оқушылардың функционалдық сауаттылығын дамытатын SMART-педагогтарды даярлау. Малайзия, Сингапур, Швеция және Финляндиядағы халықаралық тағылымдамалардың арқасында біз үздік тәжірибелерді, соның ішінде инклюзивті білім беру мен цифрлық құралдарды оқу процесіне енгізіп отырмыз», – деп түйіндеді колледж директоры Мағишат Мендгазиева.
ТжКБ жүйесінің қала және ел экономикасына қосқан үлесі
Пресс-тур Алматы қаласының техникалық және кәсіптік білім беру жүйесінің алдыңғы қатарда екенін айқын көрсетті. Түлектердің жұмыспен қамтылу деңгейінің жоғары болуы (шамамен 97,8%), заманауи материалдық-техникалық база және жұмыс берушілермен тығыз байланыс бәсекеге қабілетті кадрлар даярлауға мүмкіндік береді.
Алматы қаласының Білім басқармасы атап өткендей, WorldSkills чемпионаттарына қатысу, қарқынды ғылыми қызмет және экономиканың сұранысына бағдарлану Алматы колледждерін жоғары білікті мамандар даярлайтын орталыққа айналдырып отыр. Бұл оқу орындарының түлектері бүгінде Қазақстанның цифрлық трансформациясына, машина жасау саласына және білім беру жүйесіне елеулі үлес қосып, қаланың еліміздің білім беру хабы ретіндегі жоғары мәртебесін нығайтып жатыр.