«Алатау» дәстүрлі өнер театрында «Alatau FM radiosy» спектаклінің премьерасы мен VIII театр маусымының ресми ашылу салтанаты өтті.
Театр ұжымы алдағы маусымдағы жаңалықтарымен бөлісіп, театр алаңында әртістердің қызыл кілемдегі шеруі мен мерекелік концерт ұйымдастырылды.
– Бүгін VIII театр маусымының ресми ашылу салтанаты өтіп жатыр. Осы орайда «Alatau FM radiosy» спектаклінің премьерасы болып жатыр. Біз өткен маусымды премьерамен жауып, премьерамен ашып жатырмыз. Алдағы уақытта көптеген қойылымдар қоямыз деген жоспар бар. Соның ішінде Біржан сал, Нұрғиса Тілендиевтің 100 жылдығына, Абай Құнанбаевтың 180 жылдығына арналған қойылымдар жоспарлануда. Біздің театрымызда өнерлі актерлерімізден бөлек, әнші, биші және күйшілеріміз бар,– деді «Алатау» дәстүрлі өнер театрының директоры Мақсат Нұралиев.
– «Alatau FM radiosy» музыкалық комедия өзіміздің қазақстандық авторлардың туындысы. Жалпы қазіргі уақыттағы мәселелерді қамтитын қойылым. Спектакль өз арманыңа сеніп, ісіңе адал болуды және жақындарыңа көңіл бөлу секілді ізгі қарым-қатынасты насихаттайды. Қойылым шағын радиостанцияның бүкіл қаланың дауысына айналғаны туралы оқиғаны баяндайды. Сондай-ақ, бұл ең қиын жағдайдада өзіңе және армандарыңа сенудің арқасында тығырықтан шығудың жолын табуға болатындығы туралы қойылым,– деді қойылым режиссері Есләм Нұртазин.
«Аlatau FM radiosy» жаңа музыкалық комедиясында көрермендерді әзіл-қалжыңы жарасқан бүгінгі күннің кейіпкерлері мен жанды дауыстағы ерекше әндерін ұсынды. Көрермен жасына қарамастан, бұл қойылым барлығына нағыз мереке сезімін сыйлады.
