Ұлытау облысының Жәйрем кентінде төрт баланың анасы, 42 жастағы әйелдің қаза табуына байланысты қылмыстық іс қозғалды, – деп хабарлайды aqshamnews.kz тілшісі.
Марқұмның туыстарының айтуынша, әйелдің 33 жастағы азаматтық некедегі жолдасы күдікті. Қайғылы оқиға күндіз, әйел өз дүкенінде болған. Жақындарының сөзінше, ер адам оған пышақпен шабуыл жасаған.
Қаза болған Әйгерімнің артында төрт баласы қалды. Туыстары оның еңбекқор, мейірімді жан болғанын айтады. Ол балаларын өзі асырап, кәсіп жүргізіп, бірнеше пәтерді тәулікке жалға беріп отырған. Сонымен қатар, ерекше күтімді қажет ететін қызының емімен де өзі айналысқан.
Марқұмның әпкесі Дананың сөзінше, Әйгерім азаматтық некедегі серігі тарапынан қысым мен зорлық-зомбылықты жиі көрген. Оның айтуынша, ер адам жұмыс істемеген, ішімдікке салынған және отбасында жанжал жиі болған. Туыстары бірнеше рет полицияға да жүгінгенін айтады.
Алдын ала мәліметке сәйкес, күдікті қылмыс жасағаннан кейін өзіне де зақым келтіруге әрекет жасаған. Қазір ол ауруханада жатыр.
Ұлытау облыстық Полиция департаменті бұл дерек бойынша сотқа дейінгі тергеу басталғанын мәлімдеді. Ведомствоның хабарлауынша, іс Қылмыстық кодекстің 99-бабы 2-бөлігі бойынша қаралып жатыр. Күдіктіге қатысты күзетпен ұстау түріндегі бұлтартпау шарасы санкцияланған. Емі аяқталған соң оны тергеу изоляторына ауыстыру жоспарланып отыр.
Туыстары балаларға қамқоршылық рәсімдеп, істің әділ тергелуіне қол жеткізуді көздеп отыр. Олардың айтуынша, кішкентай балалары анасының енді оралмайтынын әлі толық түсіне қоймаған.