«Алматы қаласы күні» мерекесіне орай Жамбыл атындағы Қазақ Мемлекеттік академиялық филармониясында жетекші солистердің қатысуымен маусымашар концерті өтті.
Кештің шымылдығы филармонияның 89 жылдық тарихында қызмет еткен қазақ өнерінің майталмандары – Дина Нұрпейісова, Әміре Қашаубаев, Қали Жантілеуов, Мүсілім және Ришат Абдуллиндер, Күләш Байсейітова, Шара Жиенқұлова, Жамал Омарова, Жүсіпбек Елебеков, Бибігүл Төлегенова, Роза Бағланова, Майгүл Қазтуғанова сынды тұлғалардың есімдерімен аталып, ұлттық өнер тарихына шолумен басталды.
Концерттің алғашқы бөлімі әлемге әйгілі итальян композиторы Луиджи Боккеринидің виолончель мен фортепианоға арналған “Рондо” шығармасымен ашылды. Бұл туынды өз талғампаз стилімен кешті мәнді бастап берді. Кеште Халықаралық байқаулардың лауреаттары, филармонияның жетекші солистері Мұса Керімбаев, Әділ Несіпбаев, Гүлжан Өзенбаева, Динара Базарбаева-Сахаман, Еркебұлан Сапарбаев, Аида Аюпова сынды өнерпаздар өз өнерлерін паш етті. Көптен бері күткен маусымашар тыңдарманның ыстық ықыласымен басталып, алғашқы туындылардан-ақ гүл шоқтары мен қошеметке бөленді.
Филармонияның музыкалық саясаты – дәстүрлі қазақ музыкасы мен әлем классиктерінің шығармаларын насихаттау, осыған куә боларлықтай, сахнада халық аспаптарынан бастап, симфониялық шығармаларға дейінгі әртүрлі жанрлар орын алды. Кештің жалғасында қазақтың дәстүрлі ән-күйлері шырқалып, ұлы дала тарихы мен мәдениетіне құрмет көрсетілді.
Бағдарлама аясында Мәдениет қайраткері Ержан Әлімбетов, Мәдениет саласының үздігі Мақпал Қазыбекқызы, сондай-ақ Халықаралық байқаулардың лауреаттары Біржан Бәзілжан мен Жанқожа Аяпов дәстүрлі өнерді паш етіп, тыңдарманды тәнті етті. Концерт қазақ ән-күйімен аяқталып, көрерменнің ерекше ыстық ықыласына бөленді».
