Әскери-инженерлік радиоэлектроника мен байланыс институтына 31 шілдеге дейін құжат тапсыруға болады, – деп хабарлайды aqshamnews.kz тілшісі.
Қорғаныс министрлігінің әскери-инженерлік радиоэлектроника мен байланыс институтында оқуға құжат қабылдап жатыр. Өңірлік коммуникациялар қызметінің алаңында институт бастығының орынбасары, полковник Ойрат Атыкенов оқуға түсудің қағидалары, сұранысқа ие мамандық пен әскери білім берудің артықшылығы туралы баяндады.
Спикердің айтуынша, институт қазір осы заманғы армияның технологиялық дамуын айқындайтын ең өзекті бағыт бойынша офицерлер даярлайды. Атап айтқанда, радиотехника, радиоэлектроника, автоматтандыру мен инфокоммуникациялық технологиялар, сондай-ақ ақпараттық қауіпсіздік пен киберқорғаныс саласы бойынша маман даярлап шығарады.
«Қазақстанның қарулы күшінің алдағы 10–15 жылдағы келбеті бүгін қабылдап жатқан шешімге тәуелді. Ең алдымен, қандай офицерді даярлайтынымызға байланысты. Қазір әскери инженерлер армияның технологиялық басымдығын қамтамасыз етіп, мемлекеттің қауіпсіздігін нығайтуда шешуші рөл атқарады», – дейді Ойрат Атыкенов.
Жиырма жылдан астам уақыт ішінде институт еліміздің барлық өңірінде қызмет атқарып жүрген үш мыңнан астам офицерді даярлапты. Олар байланыс жүйесінің, радиолокацияның, әуе шабуылына қарсы қорғаныс пен ақпараттық қауіпсіздік жүйесінің үздіксіз жұмыс істеуін қамтамасыз етіп отыр.
Білім беру процесінде замандық цифрлық технологиялар, мамандандырылған тренажерлер мен симуляциялық кешендер кеңінен қолданылады. Бұл курсанттарға оқу барысында-ақ қазіргі әскери техниканың қыр-сырын меңгеріп, дағдыланып шығуына мүмкіндік береді.
Институттың басты артықшылығының бірі – еліміздің жетекші азаматтық жоғары оқу орындарымен бірлесіп қолға алған қос дипломды білім беру бағдарламасы. Биыл «Әскери журналистика» мен «Әскери дирижерлік» мамандығына қабылдау басталды. Әскери журналистер әл-Фараби атындағы Қазақ ұлттық университетінің журналистика факультетімен бірлесіп даярланса, әскери дирижерлерді Құрманғазы атындағы Қазақ ұлттық консерваториясымен бірлескен бағдарлама бойынша оқытады. Төрт жылдық оқуын аяқтаған түлектерге алғашқы офицерлік «лейтенант» әскери атағы беріліп, әскери институт пен серіктес жоғары оқу орнының екі дипломы табысталады.
«Институттағы оқу толықтай мемлекет есебінен қаржыландырылады. Курсанттар тегін біліммен, жатақханамен, тамақпен, медициналық қызметпен, киім-кешекпен және ай сайынғы ақшалай қамтамасыз етумен қамтылады. Оқуды аяқтағаннан кейін түлектерге жұмысқа орналасып, әскери қызметін жалғастыруға кепілдік беріледі», – деп атап өтті спикер.
Құжат қабылдау 31 шілдеге дейін жалғасады. Қабылдау емтихандары 1–20 тамыз аралығында өтеді. Оқуға түсу үшін 2026 жылғы ҰБТ нәтижесі «Физика – Математика» мен «Информатика – Математика» бейіндік пәндер комбинациясы бойынша қабылданады. Ең төменгі өту балы – 50. Сонымен қатар талапкерлер бір бейіндік пәннен кемінде 5 балл, қалған пәндердің әрқайсысынан кемінде 3 балл жинауы тиіс. Мерзімді әскери қызмет өткеріп жатқан немесе өткерген азаматтарға оқуға түсудің ерекше тәртібі қарастырылған.
Сөз соңында Ойрат Әтікенов әскери қызметке, инженерлік мамандықтар мен замандық технологияларға қызығушылық танытатын мектеп түлектерін Қазақстан Республикасы Қорғаныс министрлігінің әскери-инженерлік радиоэлектроника мен байланыс институтына оқуға түсуге шақырды.