АҚШ-тың жаңадан сайланған президенті Дональд Трамп бейсенбі күні Ресей президенті Владимир Путинмен телефон арқылы сөйлесіп, Украинадағы соғыс жағдайын талқылады.BBC NEWS Washington Post басылымына сілтеме жасап, Трамптың Путинге қоңырау шалғанын және Ресей басшысынан Украинадағы жағдайды ушықтырмауын сұрағанын хабарлады.
Бұл әңгімені ресми түрде растайтын пікірлер әлі жарияланбаған, ал BBC NEWS те өз бетінше бұл ақпаратты растай алмаған.
Washington Post-тың мәліметінше, Дональд Трамп 7 қараша күні Флоридадағы резиденциясынан Владимир Путинге қоңырау шалып, Еуропа құрлығындағы бейбітшілік орнату туралы сөйлескен. Трамп, сондай-ақ, Украинадағы ұрыстарды мүмкіндігінше тезірек аяқтауды талқылауға қызығушылық білдіріп, Ресей президентіне АҚШ-тың Еуропадағы әскери күштерінің едәуір мөлшерде орналасқанын ескерте отырып, жағдайды шиеленістірмеуге кеңес берген.
Washington Post жазғандай, Киев Трамптың Путинмен сөйлескені туралы алдын ала хабардар болған және оған қарсылық білдірмеген.
Алайда, Украина Сыртқы істер министрлігі бұл ақпаратты жоққа шығарып отыр.
"Украин тарапы Трамптың болжамды қоңырауы туралы алдын ала ақпарат берілді деген мәлімет шындыққа жанаспайды. Осыған орай, Украина мұндай қоңырауды қолдай да, оған қарсы да бола алмайды," – деп мәлімдеді Украина СІМ өкілі Георгий Тихий, деп хабарлайды BBC NEWS.