АҚШ президенті Дональд Трамп Иранға қарсы әскери шабуылдарды екі апта мерзімге тоқтатуға келіскенін мәлімдеді, – деп хабарлайды aqshamnews.kz тілшісі.
Оның айтуынша, бұл шешім Пәкістан премьер-министрі Шахбаз Шариф пен фельдмаршал Асим Мунирмен жүргізілген келіссөздерден кейін қабылданған.
АҚШ президенті Дональд Трамп Иранға жасалып жатқан бомбалау мен әскери шабуылдарды екі аптаға тоқтататынын жариялады. Ол бұл шешімді Пәкістанның арағайындығымен өткен келіссөздердің қорытындысы деп атады. Атап айтқанда, Трамп Пәкістан премьер-министрі Шахбаз Шарифпен және ел армиясы штабының басшысы, фельдмаршал Асим Мунирмен сөйлескеннен кейін осындай қадамға барғанын мәлімдеді.
Ақ үй басшысының сөзінше, негізгі шарттардың бірі — Иран тарапының Ормуз бұғазын толық әрі қауіпсіз ашуы. Сонымен қатар, Вашингтон мен Тегеран арасында ұзақ мерзімді бейбітшілікке негіз болуы мүмкін 10 тармақтан тұратын ұсыныс талқыланып жатқаны айтылды.
Халықаралық агенттіктердің мәліметінше, Иран да уақытша бітімге келіскен. Енді тараптар келіссөзді жалғастырып, түпкілікті мәмілеге келуге тырыспақ. Сарапшылардың бағалауынша, бұл үзіліс Таяу Шығыстағы ахуалды уақытша болса да тұрақтандыруға мүмкіндік беруі мүмкін. Алайда жағдай әлі де құбылмалы күйінде қалып отыр.
Еске салайық, бұған дейін Қазақстан Президенті Қасым-Жомарт Тоқаев та Таяу Шығыстағы бітімге қатысты мәлімдеме жасап, қол жеткізілген келісімді құптаған еді.