Қазақстандық әйелге сурет үшін 129 мың теңге айыппұл салынды
Бұған әлеуметтік желідегі сурет себеп болған, деп хабарлайды Almaty-akshamy.kz Атырау облыстық сотына сілтеме жасап.
Атыраудың Әкімшілік құқық бұзушылық істері жөніндегі соты ҚР ӘҚБтК-нің 490-бабы "Діни қызмет және діни бірлестіктер туралы заңнаманы бұзу" бойынша істі қарады.
Атырау тұрғыны "ВКонтакте" әлеуметтік желісіндегі жеке парақшасына діни мазмұндағы сурет жариялап, осы бапты бұзған.
"А-ның кінәсі сот отырысында зерттелген іс материалдары, әкімшілік құқық бұзушылық туралы хаттама, сарапшының қорытындысы, әңгімелесу хаттамасымен расталды", - делінген сотта.
Әйелге 129 мың 220 теңге айыппұл салынды. Сот қаулысы заңды күшіне енді.