Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын және өзге де тапсырмаларын жүзеге асыру аясында құқық қорғау саласында заманауи цифрлық технологияларды кеңінен енгізу қолға алынуда. Бұл – қылмыстың алдын алу мен азаматтардың қауіпсіздігін қамтамасыз етудің басты тетігі.
Қазіргі таңда еліміз бойынша 19 мыңнан астам бейнебақылау камерасы жасанды интеллект технологияларымен жабдықталған. Олар адамның бет-әлпетін тануға, заттарды талдауға және көлік ағындарын бақылауға қабілетті. Жүйелер жедел басқару орталықтарымен интеграцияланғандықтан, оқиғаларға нақты уақыт режимінде жедел әрекет етуге мүмкіндік береді.
Полиция қызметкерлері де жаңа техникалық құралдармен қамтылуда: заманауи планшеттер, смарт-жетондар мен байланыс жүйелері тәртіп сақшыларының ұтқырлығын және жұмысының тиімділігін арттырды.
Азаматтар үшін ыңғайлы «102» мобильді қосымшасы, сондай-ақ eGovMobile және екінші деңгейдегі банктердің қосымшасына енгізілген «Заң және тәртіп» сервисі арқылы кез келген құқық бұзушылық туралы бір батырманы басу арқылы хабарлауға болады. Бұл қоғам мен құқық қорғау органдары арасындағы байланысты нығайтып, сенім деңгейін арттырады.
Сонымен бірге, цифрлық шешімдердің көмегімен алаяқтыққа қарсы күрес күшейтілді. Мәселен, алаяқтардың азаматтардың есеп-шоттарынан 2,2 млрд теңге көлеміндегі қаражатты ұрлау әрекетінің жолы кесілді. Қаржы нарығындағы құқықтық және цифрлық сауаттылықты арттыруға бағытталған түсіндіру жұмыстары да жүйелі түрде жүргізілуде.
Ержан Сәденов атап өткендей:
«Цифрлық технологиялар тек қауіпсіздікті қамтамасыз етуде ғана емес, халықтың құқықтық мәдениетін көтеруде де маңызды рөл атқарып отыр. Бұл – Қазақстанды құқықтық әрі әділетті мемлекет ретінде нығайтудың жаңа қадамы».