Шымкенттегі Адам құқықтары жөніндегі уәкілдің өңірлік өкілі Нұржан Әбдезов сотталғандардың бірін жеке қабылдап, қабылдау барысында ол азаптау дерегі бойынша шағым түсіргенін айтты, - деп хабарлайды aqshamnews.kz тілшісі.
Тұтқынның айтуынша, 2025 жылғы маусымда мекеме қызметкерлері оны соққыға жығып, қолына кісен салып, темір торға іліп, 4 сағат бойы сол күйі қалдырған. Сондай-ақ, оның аяқ киімін шешіп алып, табанынан ұрғаны айтылған.
"Сонымен қатар, қабылдау кезінде басқа бір сотталғанның да соққыға жығылғаны анықталды: оның жақ сүйегі сынған", - делінген Қазақстандағы Адам құқықтары жөніндегі уәкілдің сайтындағы хабарламада.
Өтініш қорытындысы бойынша медициналық көмекті уақытылы көрсетпегені үшін медицина қызметкерлері жазаланған. Сондай-ақ, мекеме қызметкерлеріне қатысты ҚР Қылмыстық кодексінің 362-бабы ("Билікті немесе лауазымдық өкілеттіктерді асыра пайдалану") бойынша соталды тергеп-тексеру тіркелген.
"Жоғары қадағалау органына қызметкерлердің әрекеттерін қайта қарау туралы өтініш жолданды, өйткені онда азаптау белгілері бар", - деп те көрсетілген хабарламада.
Нәтижесінде Бас прокуратура бұл ұстанымды қолдап, соталды тергеп-тексеру ҚР Қылмыстық кодексінің 146-бабы 3-бөлігі ("Қатыгез, адамгершілікке жатпайтын немесе қадір-қасиетті қорлайтын қарым-қатынас, азаптау") бойынша қайта сараланған. Мекеменің үш қызметкері қамауға алынды.