Бас прокуратура кезекті экстрадиция туралы мәлімдеді. Қадағалаушы органның ақпараты бойынша, Қазақстанға ірі алаяқтық жасады деген күдікке ілінген Өзбекстан азаматшасы жеткізілді, деп хабарлайды aqshamnews.kz
2005-2007 жылдары бұл азаматша Алматы қаласындағы құрылыс компаниясында есепші болып жұмыс істеген. Ол үлескерлерден ақша қабылдап, жалған түбіртектер жазып берген. Алайда, тұрғын үй кешенінің құрылысы аяқталмаған.
«Оның және қылмысқа қатысы бар басқа тұлғалардың әрекеттерінің салдарынан Алматы қаласының 80-нен астам тұрғыны зардап шекті. Келтірілген шығын көлемі 3,7 миллиард теңгеден асты», – деп хабарлады Бас прокуратура.
Алаяқтық жасалғаннан кейін күдікті қашып кеткен және оған халықаралық іздеу жарияланған. 2023 жылдың желтоқсанында бұл әйел Ресейдің Краснодар өлкесінде ұсталды. Қазақстан прокуратурасының сұрауы бойынша, ол экстрадицияланды.
Енді күдіктіні 5 жылдан 10 жылға дейін бас бостандығынан айыру, сондай-ақ мүлкін тәркілеу жазасы күтіп тұр.