Ресей аумағындағы металлургиялық кәсіпорында Қазақстанның екі азаматы қаза тапты, деп хабарлайды Аqshamnews.kz тілшісі.
Қайғылы оқиға Ресейдің Вологда облысында орналасқан Череповец металлургиялық комбинаты аумағында болған. Аталған кәсіпорын – Северсталь компаниясының негізгі өндірістік активтерінің бірі.
Компанияның мәліметінше, 14 қаңтарда комбинаттың өндірістік алаңынан мердігер ұйымдарда жұмыс істеген екі қызметкердің мәйіті табылған. Олар - Қазақстан азаматтары.
"14 қаңтарда ЧерМК өндірістік алаңында мердігер ұйымдардың екі қызметкері – Қазақстан азаматтары өлі табылды. Қазіргі уақытта оқиғаның себептері анықталып жатыр, оқиға орнында арнайы қызметтер жұмыс істеп жатыр. Қаза тапқандардың жақындарына көңіл айтамыз", – деп хабарлады “Северсталь” компаниясы.
Вологда облысы бойынша Ресей Федерациясы Тергеу комитетінің дерегінше, оқиға орнында жедел-тергеу тобы жұмыс істеп жатыр. Қайғылы жағдайдың нақты себептері анықталу үстінде.
