Испанияның әйгілі «Реал Мадрид» футболшылары Қазақстанға келген соң клубтың ресми Instagram парақшасында Алматы қаласы туралы екі бейнеролик жариялаған.
Қаланың сұлулығын бейнелейтін екі ролик аз күнде 20 миллионнан астам қаралым жинап, 100 мыңнан аса адам пікір қалдырған.
Видеоларда Алматының басты нышандары-Панфиловшылар саябағындағы Вознесенск соборы, өнер қайраткерлерінің ескерткіштері және «Көк Төбе» панорамалық саябағынан қалаға қарайтын әдемі көрініс бейнеленген. Роликте қолына домбыра ұстап, әуендетіп тұрған қазақтың қара домалақ азаматы мен құстардың ерекше үні де байқалады. Ал қазақстандық жанкүйерлер елімізді «Реалдық» футболшылардың әлеуметтік парақшасынан көреміз деп ойламадық дейді: «Қайран, туған жерім! Реал парақшасынан Алматыны көремін деп ойламадым. Енді бізді миллиондаған шетелдіктер тануда».
Әлемдік спорт жанкүйерлері үшін футболшылар ғана емес, еліміздің оңтүстік астанасы Алматы да басты назарға ілікті. Себебі роликтен кейін қаладағы тарихи әрі туристік орындарды көргісі келген оқырмандардың саны артқан.