Кеше, 28 қыркүйек "Реал Мадрид" футболшылары Мадридтен Алматыға тікелей рейспен 8 сағат ұшып келген болатын. Ұзақ жолдың әсері мен алдағы ойынға дайындық туралы сұраққа команда бас бапкері Хаби Алонсо жауап берді, деп хабарлайды Aqshamnews.kz.
Ол ойынға дайын екендерін айтты.
"Ұзақ сапар, 7 мың шақырымнан аса жолды еңсеру әрине, оңай емес. Бірақ бұл біз үшін үйреншікті жағдай. Біз үнемі бейімделуіміз керек. Ертеңгі матчқа тыңғылықты дайындалуымыз қажет. Ал алыстан келген жолды шаршадық деп сылтау айта алмаймыз", – деді бапкер.
Хаби Алонсоның айтуынша, бастапқы құрам ойыншыларына демалыс беру қарастырылмаған.
"Қалай болғанда да біз алаңға шығамыз. «Қайратқа» қарсы ойнауға дайындалдық. Олардың Чемпиондар лигасына алғаш шығып тұрғанын білеміз. Қарсыласты қысымға алып, шабуылға жиі шығамыз. Өте қарқынды матч болғалы тұр. «Қайраттың» ұйымдасқан команда екенін білеміз", – деді ол.
Сонымен қатар бапкер қазақстандық клубтың ойындарын мұқият бақылағанын айтты:
"Біз «Селтикке» де, «Спортингке» де қарсы өткен матчтарын көрдік. «Қайраттың» комбинациялық ойыны бар, сонымен бірге тікелей шабуылға шығатын сәттерін де байқадық. Бұл – мықты бәсекелес бола алатын команда екенін көрсетті", – деді Алонсо.
Айта кетейік, 30 қыркүйек күні Алматыдағы Орталық стадионда «Қайрат» пен «Реал Мадрид» арасындағы кездесу өтеді.