Мадридтік "Реал" футболшылары Алматы әуежайына қонды. 30 қыркүйекте олар алматылық "Қайратпен" Чемпиондар лигасындағы ойынын өткізеді, - деп хабарлайды aqshamnews.kz тілшісі.
Футбол жанкүйерлері әуежайға ұшақ қонғанға дейін жиналып үлгерген. Футболшылар ұшақтан түсіп, қонақүйге беттеді. Олар бірнеше ақ автобусқа мінді.
Жанкүйерлер әуежай мен спортшылар тұрақтайтын қонақүйдің алдында жиналып тұр. Олар әлеуметтік желіде тікелей эфир ашып, әсерін бөлісіп жатыр.
Болат Айтмолда
Әуежай ғимараты мен оның маңы полицияның қатаң бақылауында.
"Реал Мадридтің" Алматыға рейсін 22 мыңнан аса адам бақылаған. Бұл Flight Radar сервисіндегі ең танымал рейс болды.
Бұған дейін мадридтік "Реал" "Қайратқа" қарсы ойнайтын құрам тізімін жариялаған болатын. Осы ұшақпен бірге "Реал Мадрид" жанкүйерлері де ұшып келді.
Айта кетейік, Алматыға Трент Александр-Арнольд, Антонио Рюдигер, Ферлан Менди, Даниэль Карвахаль және Эдер Милитао келмеді. Олар жарақат алған ойыншылар тізімінде.
Еске салайық, биылғы маусымда "Қайрат" өз тарихында алғаш рет Чемпиондар лигасына қатысып отыр. Алматы командасының елдегі алғашқы матчі 30 қыркүйекте сағат 21:45-те мадридтік "Реалға" қарсы өтеді.