Отандық ғылымның жетістігін дәріптеу
Отандық QazVac вакцинасының үшінші кезең бойынша клиникалық зерттеу жұмысы аяқталды. Бұл туралы Биологиялық қауіпсіздік проблемаларының ғылыми-зерттеу институтының бас директоры, коронавирусқа қарсы QazVac қазақстандық вакцинаның авторы Күнсұлу Закарья мәлім етті, деп хабарлайды Almaty-akshamy.kz ҚазАқпаратқа сілтеме жасап.
«Бүгінде үшінші кезең бойынша барлық клиникалық зерттеу аяқталып, 9 шілде күні соңғы талдау нәтижесі алынды. Шілденің соңына дейін талдау нәтижесі тағы бір өңделіп, мәліметтердің статистикасы жасалды. Бұл жұмысқа 3 мың адам қатысып отыр. Сондай-ақ, шілденің соңында клиникалық зерттеудің қорытынды есебі әзірленді. Қазіргі күні қорытынды есеп Дәрілік заттар мен медициналық бұйымдарды сараптау ұлттық орталығының сараптауынан өтіп жатыр, оның нәтижесі әлі келген жоқ. Дегенмен біздің әзірлеген есепке қарап, алғаш отандық вакцинаны клиникалық зерттеу сәтті жүргізілді деп айтуға болады», - деді Күнсұлу Закарья.
Сондай-ақ, отандық ғалым QazVac-тың үшінші кезеңіне қатысты қорытынды есеп оң баға берілген жағдайда отандық вакцина туралы ғылыми мақалалардың жарық көретінін айтты. Қазақстандық вакцинаның авторы Күнсұлу Закарьяның айтуынша, QazVac-тың үшінші кезеңі бойынша барлық клиникалық зерттеу есебін Дәрілік заттар мен медициналық бұйымдарды сараптау ұлттық орталығы мақұлдаған жағдайда, қазақстандық вакцина туралы көпке танымал журналдарға мақала жария етілмек. Ондағы мақсат - отандық ғылымның жетістігін дәріптеу.