Қазақстандық теннисші Жібек Құламбаева Үндістанда өтіп жатқан ITF W15 турнирінде сәтті өнер көрсетіп, жекелей және жұптық сында жартылай финалға жолдама алды, – деп хабарлайды aqshamnews.kz тілшісі.
Қазақстанның теннисшісі Жібек Құламбаева Үндістандағы ITF W15 санатындағы турнирде жеңісті жолын жалғастырып жатыр. WTA рейтингінде 406-орында тұрған спортшы жекелей де, жұптық бәсекеде де жартылай финалға шықты.
Жекелей сындағы ширек финалда Құламбаева үндістандық Мадхурри Савантпен кездесіп, айқын басымдықпен жеңіске жетті. Матч 6:1, 6:0 есебімен аяқталды.
Ал жұптық бәсекеде қазақстандық теннисші ресейлік Екатерина Яшинамен бірге өнер көрсетті. Екі спортшы Ұлыбритания өкілі Мелисса Бойден мен Малайзия теннисшісі Эльза Ваннан құралған жұпты 1 сағат 5 минутта жеңді. Кездесу барысында Қазақстан-Ресей дуэті бес брейк жасап, өз геймінде бір рет қана осалдық танытты. Қорытынды есеп — 6:1, 6:3.
Айта кетейік, өткен аптада Жібек Құламбаева Нагпур қаласында өткен дәл осы санаттағы турнирде жекелей және жұптық сында топ жарып, абсолютті чемпион атанған еді.