Бүгін, 23 шілде сағат 18:01-ден бастап Қазақстанда сайлауалды үгіт-насихат кезеңі ресми түрде басталды. Ол 2026 жылғы 22 тамыз сағат 00:00-ге дейін жалғасады, – деп хабарлайды aqshamnews.kz тілшісі.
Бас прокуратураның мәліметінше, үгіт жұмыстары бұқаралық ақпарат құралдары, онлайн-платформалар, сайлауалды іс-шаралар және үгіт материалдарын тарату арқылы жүргізіледі.
Сонымен қатар, телерадиоарналарға жаңалықтар мен сараптамалық бағдарламаларда үгіт материалдарын таратуға тыйым салынады. Сондай-ақ кандидат немесе оның сенімді өкілі ретінде тіркелген журналистердің сайлау науқанын БАҚ арқылы жариялауына жол берілмейді. Бұл талаптарды бұзғандарға Әкімшілік құқық бұзушылық туралы кодекске сәйкес айыппұл қарастырылған.
БАҚ пен онлайн-платформалар кандидаттар мен саяси партиялардың қызметін объективті жариялап, олардың ар-намысы мен іскерлік беделіне нұқсан келтіретін жалған ақпарат таратпауы тиіс. Заң талаптарын бұзғандарға 20-дан 50 АЕК-ке дейін айыппұл салынуы мүмкін.
Сондай-ақ үгіт материалдарын ақылы негізде орналастыратын БАҚ пен онлайн-платформалар орналастыру құны мен шарттары туралы мәліметті алдын ала Орталық сайлау комиссиясына ұсынуы қажет. Бұл талап орындалмаған жағдайда да әкімшілік жауапкершілік көзделген.
Бас прокуратура сайлау процесіне қатысушыларды заң талаптарын қатаң сақтауға, құқық бұзушылықтарға жол бермеуге және қоғамдық тәртіпті қамтамасыз етуге шақырды.