Құтқару шеңбері Қазақстан-Қытай мемлекеттік шекарасы мен іргелес аумақтар бойымен белгіленеді.
ҚР Сенатының жалпы отырысында палата депутаттары ҚР «ҚР Үкіметі мен Қытай Халық Республикасының Үкіметі арасында азаматтық әуе кемелерін авиациялық іздестіру және құтқару саласындағы ынтымақтастық туралы келісімді ратификациялау туралы» заңын мақұлдады, деп хабарлайды Almaty-akshamy.kz.
Сенаттың Экономикалық саясат, инновациялық даму және кәсіпкерлік комитетінің мүшесі Сүйіндік Алдашев келісімнің басты мақсаты – халықаралық азаматтық авиация ұйымының стандарттары мен ұсынылатын тәжірибесіне сәйкес, апатқа ұшыраған жолаушыларды, экипаждарды, ұшақтарды іздеу және құтқару бойынша мемлекеттер арасында тығыз ынтымақтастықты құру.
«Құтқаруды ұйымдастыру және жүзеге асыру нақты іс-қимылдардың нақты алгоритмін қарастырады. Бұл құтқару шекарасы Қазақстан-Қытай мемлекеттік шекарасы және оған іргелес жатқан аумақтар арасындағы шекара бойымен белгіленеді. Бұдан әрі барлық іздеу-құтқару жұмыстары республика аумағында, Қазақстан мен Қытай, сонымен бірге іргелес жатқан аймақтарда әр мемлекеттің заңнамасына сәйкес жүзеге асырылады», - деді Сүйіндік Алдашев.
Әр тарап өз аймағында азаматтық әуе кемелерін іздестіру-құтқару жөніндегі жауапты қызмет болуын және олардың тәулік бойы кезекшілігін қамтамасыз ететінін қоса кетті.
«Тағы бір келісімде тараптардың авиациялық оқиға туралы өзара хабардар ету және екінші тараптан көмек сұрау міндеттемесі қарастырылған. Тараптар өздерінің жауапкершілік аймағында іздестіру-құтқару жүргізуден туындайтын шығындарды дербес көтереді», - деді Сүйіндік Алдашев.
Оның айтуынша, келісім екі мемлекеттің құзырлы органдары мен іздеу-құтқару қызметтері арасындағы ынтымақтастықты нығайтуды көздейді.
Мұндай ынтымақтастық бірлескен іздестіру-құтқару жаттығуларын, мемлекетаралық байланыс арналарын тұрақты тексеруді, іздестіру-құтқару мамандарының өзара сапарларын, іздестіру-құтқару ақпаратымен және тәжірибе алмасуды қамтиды.
30 қарашада Мәжіліс Қазақстан мен Қытай үкіметтері арасындағы азаматтық әуе кемелерін авиациялық іздестіру және құтқару саласындағы ынтымақтастық туралы келісімді ратификациялауды мақұлдады.