Кінәлілер сот тәртібімен заң аясында жазалануы тиіс
Қазақстан халқы Ассамблеясы «Народный Совет Петропавловск» деп аталатын ұйымның атынан шыққан бір топ адамның арандатушылық мәлімдемесін қатаң айыптады, деп хабарлайды Almaty-akshamy.kz.
«Біз, Қазақстан халқы Ассамблеясының өкілдері, Қазақстан Республикасының аумақтық тұтастығының мызғымастығын және оған ішкі және халықаралық заңнамаммен кепілдік берілгенін мәлімдейміз. Бұл әрекеттерді мемлекетіміздің конституциялық негіздеріне, қауіпсіздігіне, бірлігі мен тұрақтылығына қарсы бағытталған ел мүддесіне жасалған опасыздық деп бағалаймыз. Біз біртұтас халық ретінде қазақстандық қоғамда ешкімнің араздық пен сенімсіздік таратуына жол бермейміз», - делінген ұйымның мәлімдемесінде.
Ассамблея мұндай арандатушылықтар аса жауапсыздықтың көрінісі және құзырлы органдар тарапынан қатаң тыйылуы керек деп есептейді.
Кінәлілер сот тәртібімен заң аясында жазалануы тиіс.
«Қазақстан халқы Ассамблеясы азаматтарды мұндай әрекеттерге бой алдырмауға және мызғымас бірлігіміз бен қоғамдық келісіміміздің негізі – халқымызға тән даналықты, төзімділікті, сенім мен өзара сыйластықты сақтауға шақырады. Қазақстан – біздің ортақ шаңырағымыз және біз қай жерде болсақ та сүйікті Отанымыздың өкілдеріміз, ал халықаралық қауымдастық бізді біртұтас әрі қуатты ұлт ретінде таниды. Біз әртүрліміз, бірақ бірлігіміз әралуандылықта. Бұл қағидадан біз ешқашан ауытқымаймыз», - дейді ұйым мүшелері.
Еске сала кетейік, бүгін Бас прокуратура СҚО-да сепаратизмді насихаттау ісіне қатысты тергеу басталғанын хабарлаған болатын.