Спорттық гимнастикадан Қазақстан құрамасы Ташкентте өтіп жатқан Challenge Cup халықаралық турнирінде үш бірдей жүлдеге қол жеткізді, деп хабарлайды Aqshamnews.kz тілшісі Ұлттық олимпиада комитетіне сілтеме жасап.
Ерлер арасындағы қос сырық жаттығуында Ілияс Әзізов 13.100 ұпаймен күміс жүлдегер атанса, оның командаласы Дмитрий Патанин 12.700 ұпаймен қола медальға ие болды. Бұл бағдарламада бірінші орынды өзбекстандық Ахрорхон Темирхонов 13.550 ұпаймен жеңіп алды.
Ал әйелдер арасындағы бөрене жаттығуында Көркем Ербосынқызы 12.100 ұпай жинап, үшінші орынға табан тіреді. Бұл сында алтын жүлде Алжир спортшысы Кайлия Немурға (13.300 ұпай), күміс медаль Өзбекстан өкілі Одинахон Робиджоноваға (12.500 ұпай) бұйырды.