Бұдан бұрын марқұмдардың аты-жөні жазылған тізімді жариялағанбыз.
ҚАРАЛЫ ЖЫР
«Жомарт» кен орнындағы үйінді астынан жеті жұмысшының денесі табылды. =ақпараттан=
«Жомарт» та менің ауылым еді,
Бауырым еді жеті арыс.
Қайғы кеп түрді тағы да іргені,
Қырсықтың болсын бет алыс.
Қобыз да шалған,
Кейде өлең айтқан,
Сарыарқа белі,
саяң нұр.
... Жошы қазасын күйменен айтқан
Кетбұға бабам,
оян бір!
Біледі дейсің өмірі ұқпаған,
Ажалдың мынау кім сырын?
Жеті қат жерде көміліп қалған
Жеті арыс,
Жеті қыршыным!
Ей, Жаңаарқам,
көкті жаңғыртасың ба,
Опаттан оғлан озғасын...
Ұлытауымның тарғыл тасына
Тарамдап аққан көз жасым.
Бір биік болып тұрсың, Едіге,
Шала да жансар бір кездер...
Күңгіріттеу үнмен күрсінеді ме
Күңгір де күңгір күмбездер?!
Тарылтқаның ба,
өрісті күнім,
Шатылмас жерде шатылып.
Сарысу мен Кеңгір көрісті бүгін.
Ақпанның айы аһ ұрып...
Төрге озғандары төңірегімнің,
Күйіс қайырған қодастай...
Жанарын сүртші,
Менің елімнің –
Қайғыдан тұрған көз ашпай!
Ғалым ЖАЙЛЫБАЙ, ақын, Халықаралық «Алаш» әдеби сыйлығының лауреаты.