Ресейдің Ижевск қаласындағы мектепте ер адам қарудан оқ жаудырды
ҚР Президенті Қасым-Жомарт Тоқаев Ижевск қаласындағы мектепке жасалған шабуыл салдарынан адамдардың қаза табуына байланысты Владимир Путинге көңіл айтты. Almaty-akshamy.kz бұл туралы Ақордаға сілтеме жасап хабарлайды.
«Ресей Федерациясының Ижевск қаласындағы №88 мектепке жасалған қарулы шабуыл салдарынан азаматтардың, соның ішінде балалардың қаза табуы туралы қайғылы хабарды ауыр күйзеліспен қабылдадым. Орны толмас қайғыға ортақтаса отырып, Сізге және қайтыс болғандардың туған-туыстары мен жақындарына көңіл айтамын. Сондай-ақ барлық зардап шеккендердің тезірек сауығып кетуіне тілектестік білдіремін», – деп жазылған жеделхатта.
Еске салайық, кеше Ресейдің Ижевск қаласындағы мектепте ер адам қарудан оқ жаудырды. Кейін қаскөй өз-өзіне қол салған.
Соңғы мәліметке сәйкес, оқиға салдарынан қаза тапқандар саны 13 адамға жетті. Олардың арасында 7 бала бар. 21 адам жарақат алды, оның 14-і – балалар.
Мектеп Ижевск қаласының орталығында қала әкімшілігі ғимаратының жанында орналасқан. Онда 982 оқушы оқиды, 80 мұғалім жұмыс істейді.