Қырғызстанның бұрынғы күштік құрылым басшысы Қамшыбек Тәшиев тағы бір лауазымымен қоштасты, – деп хабарлайды aqshamnews.kz тілшісі 24.kg-ге сілтеме жасап.
Ол екі жылдан астам уақыт бойы Қырғыз футбол одағының президенті қызметін атқарған. 15 сәуір күні өткен ұйым конгресінде Тәшиев атқарылған жұмыстар бойынша есеп беріп, бұл мінберде төраға ретінде кейінгі рет сөйлеп тұрғанын жеткізді.
Оның айтуынша, Қырғызстанда футболды табыс көзіне айналған сала деуге келмейді. Сондай-ақ ол өз миссиясын орындағанын айтып, ендігі жерде бұл қызметке футболды шын сүйетін адам келуі керектігін атап өтті.
Айта кетейік, бұған дейін, 10 ақпанда Қамшыбек Тәшиев Қырғызстан министрлер кабинеті төрағасының орынбасары және Мемлекеттік ұлттық қауіпсіздік комитетінің төрағасы қызметінен босатылған еді. Ол бұл лауазымға 2020 жылғы 16 қазанда тағайындалған болатын.
Кейінірек Қырғызстан президенті Садыр Жапаров Тәшиевпен қызметтен кеткеннен кейін жеке кездескенін мәлімдеді. Президенттің сөзінше, бұл шешім арқылы ол керісінше жақын серігін сақтап қалған. Жапаров егер Тәшиев қызметінде қала бергенде, мемлекеттік аппарат ішінде де, қоғам арасында да түсінбеушілік пен алауыздық күшеюі мүмкін еді деп түсіндірді.
Сонымен қатар, Қырғызстан басшысы Қамшыбек Тәшиевтің айналасындағы кейбір адамдар оның атын пайдаланып, түрлі лауазымды тұлғалар мен қоғам өкілдеріне ықпал етуге тырысқанын айтқан болатын.