Ұлттық қауіпсіздік комитетінің (ҰҚК) бұрынғы төрағасы, сотталған Кәрим Мәсімовтің үйінен алынған қымбат бұйымдар 7 қазанда өткен аукционда сатылды, - деп хабарлайды Аqshamnews.kz тілшісі.
Қайтарылған активтерді басқару компаниясы (ҚАБК) 10 түрлі қымбат затты саудаға шығарды. Олардың ішінде коллекциялық қаламдар, монеталар, қылыштар, қанжарлар және ұлттық өрнегі бар белдік бар.
Құжаттарда бұл заттардың сипаттамасы Кәрим Мәсімовтің ерекше үйімен сәйкес келетін нысаннан алынған мүлік ретінде көрсетілген.
Саудаға қойылған заттардың жалпы құны 3,5 миллион теңгеден асты.
Не сатылды?
Аукцион 7 қазанда сағат 12:00-де электрон сауда алаңында өтті. Он лоттың жетеуі сатылды.
Сатылған қымбат заттар:
-
Montegrappa Italia жазу қаламы (күміс, 925 сынама) 440 мың теңгеге сатылды;
-
Visconti Firenze қаламы (Құран сүрелерімен өрнектелген) 402 мың теңгеге сатылды.
Сондай-ақ, сатылған қару-жарақтар:
-
Сүйек сабы мен тізбегі бар қылыш – 930 мың теңгеге;
-
Сары металмен өрнектелген қылыш – 837 мың теңгеге;
-
Болат қанжар (қынабымен бірге) – 185 мың теңгеге.
Фото: e-qazyna.kz
Коллекциялық монеталар да сатылды:
-
"Алма отаны", "Астана", "Бәйтерек" және "Қазақстан картасы" монеталарының жиынтығы – шамамен 199 мың теңгеге;
-
Тағы екі монета – 1000 теңгелік (2003 жылғы) және "Еуразия елдерінің астаналары" 500 теңгелік (2008 жылғы) – 82 999 теңгеге сатылды.
Фото: e-qazyna.kz
Не сатылмай қалды?
Кейбір лоттар сатылмай қалды:
- Үш монетадан тұратын жинақ: "Алтын адам" және "Тәуелсіздікке 20 жыл" (500 теңгелік, 2011 ж.) – бастапқы бағасы 155 мың теңгеден;
-
"Шығыс күнтізбесі" және "Қазақстан фаунасы" сериясындағы монеталар (500 теңгелік, 2010–2011 жж.) – 107 мың теңгеден;
-
Қораптағы былғары белдік – 183 750 теңге.
Фото: e-qazyna.kz
Айта кетейік, ҚАБК осымен екінші рет заттарды сатуға талпынды. Алғашқысы 16 қыркүйекте өткен, бірақ сол кезде сатып алушылар табылмаған еді.
